الماتى تاۋلارىندا جوعالىپ كەتكەن بويجەتكەن تابىلدى، ءقازىر ونىڭ جاعدايى اۋىر، دەپ حابارلادى توتەنشە جاعدايلار دەپارتامەنتى.

دەپارتامەنت مالىمەتىنشە، جوعالعان قىز 8 شىلدە كۇنى ساعات 10.56-دا تابىلعان. 

"8 شىلدەدە ساعات 10:56-دا قالالىق توتەنشە جاعدايلار دەپارتامەنتى جەدەل-قۇتقارۋ جاساعىنا، جوعالىپ كەتكەن ءاليا كامييەۆا تابىلعانى تۋرالى اقپارات كەلىپ ءتۇستى. ونىڭ جاعدايى اۋىر دەپ باعالاندى، زارداپ شەگۋشى اۋرۋحاناعا جاتقىزىلدى. دەپارتامەنت "قازاۆيا قۇتقارۋ" تىكۇشاعىن ۇيىمداستىردى" دەلىنگەن حابارلامادا.

ءاليا كامييەۆا 5 شىلدە كۇنى تاڭەرتەڭ ۇلكەن الماتى كولىنە سەرۋەندەپ شىعىپ، جوعالىپ كەتكەن. ونىڭ وزىمەن تەلەفونى بولماعان. ىزدەستىرۋ-قۇتقارۋ جۇمىستارىنا جەدەل-قۇتقارۋ جاساعىنىڭ قىزمەتكەرلەرى، ەكى كينولوگ، "109" قۇتقارۋ قىزمەتى جانە 75 ەرىكتى جۇمىلدىرىلعان.