اقتوبەدەگى 7 جاسار وقۋشىنىڭ تۋىستارى زورلىق-زومبىلىق تۋرالى مالىمدەگەننەن كەيىن مەكتەپ ديرەكتورى مەن ديرەكتوردىڭ ورىنباسارى قىزمەتىنەن بوساتىلدى. بۇل تۋرالى ءبىلىم جانە عىلىم مينيسترلىگىنىڭ رەسمي سايتى مالىمدەدى.

بعم بالالاردىڭ قۇقىقتارىن قورعاۋ كوميتەتىنىڭ ءتوراعاسى ەسەنعازى يمانعالييەۆ پەن ق ر ءبىلىم جانە عىلىم ءمينيسترىنىڭ بالالاردىڭ قۇقىقتارىن قورعاۋ ماسەلەلەرى جونىندەگى كەڭەسشىسى رايسا شەر اقتوبە وبلىسىنا بارىپ، زارداپ شەككەن بالانىڭ وتباسىمەن كەزدەسكەن.

مينيسترلىك وكىلدەرى بالانىڭ جاعدايىمەن تانىسىپ، بالا مەن ونىڭ تۋىستارىنا قانداي كومەك قاجەت ەكەنىن سۇراپ بىلگەن. بالاعا جان-جاقتى كومەك، ونىڭ ىشىندە پسيحولوگيالىق كومەك كورسەتىلمەك.

– اقتوبە وبلىسى اكىمدىگى ءبىلىم باسقارماسى ءبىلىم جانە عىلىم مينيسترلىگىنە وقۋشى اتا-اناسىنىڭ ءوتىنىشى تۋرالى ۋاقىتىلى حابارلامادى. مەكتەپ اكىمشىلىگى قاجەتتى جۇمىستى جۇرگىزبەي، تۋىستارىنىڭ ۇندەۋىنە ءتيىستى نازار اۋدارماعان. اكىمدىكتەر جانىنداعى بارلىق ءبىلىم باسقارماسى مەكتەپتەردە نە بولىپ جاتقانىن باقىلاۋدا ۇستاۋعا جانە وڭىرلەردە نە بولىپ جاتقانىن بىلۋگە ءتيىس. مەكتەپتە ءار بالا ءۇشىن ىڭعايلى بولاتىن جاعداي جاساۋ كەرەك. نەمقۇرايلىلىققا جول بەرىلمەيدى، — دەدى بالالار قۇقىعىن قورعاۋ كوميتەتىنىڭ ءتوراعاسى ەسەنعازى يمانعالييەۆ.

سونداي-اق بعم وكىلدەرى اقتوبە وبلىسى اكىمىنىڭ ورىنباسارى، اقتوبە وبلىسى اكىمدىگىنىڭ ءبىلىم باسقارماسى باسشىلىعى، قۇقىق قورعاۋ ورگاندارى مەن قامقورشىلىق كەڭەسىنىڭ قاتىسۋىمەن كەڭەس وتكىزدى. وندا بولعان وقيعاعا بايلانىستى جاعداي تولىق انىقتالعانعا دەيىن مەكتەپ ديرەكتورى مەن ديرەكتوردىڭ ورىنباسارىن قىزمەتىنەن شەتتەتۋ تۋرالى شەشىم قابىلدادى. 

ەسكە سالا كەتەيىك، اقتوبەدە وسىدان ءتورت اي بۇرىن 9-سىنىپتىڭ ءتورت وقۋشىسى 7 جاسار بالاعا قىسىم كورسەتىپ، مەكتەپ ىشىندەگى دارەتحانادا زورلاعانى حابارلانعان.