ەڭبەك جانە حالىقتى الەۋمەتتىك قورعاۋ مينيسترلىگى 1 شىلدەدەگى جاعداي بويىنشا قازاقستانداعى زەينەتاقى تولەمدەرىنىڭ ورتاشا مولشەرىن اتادى. 

2021 جىلدىڭ قاڭتار - ماۋسىم ايلارىندا رەسپۋبليكالىق بيۋدجەتتەن بازالىق زەينەتاقى تولەۋگە 410،8 ملرد تەڭگە، ىنتىماقتى زەينەتاقى تولەمدەرىنە – 928،9 ملرد تەڭگە باعىتتالدى.

1 شىلدەدەگى جاعداي بويىنشا زەينەتكەرلەر سانى 2 ملن 239 مىڭ ادامدى قۇرايدى.

"2021 جىلعى ماۋسىمدا رەسپۋبليكالىق بيۋدجەتتەن زەينەتاقى تولەمدەرىنە 222،3 ملرد تەڭگەدەن استام، ونىڭ ىشىندە بازالىق زەينەتاقىنى تولەۋگە – 68،2 ملرد تەڭگە، ىنتىماقتى زەينەتاقىنى تولەۋگە – 154،1 ملرد تەڭگە باعىتتالدى. زەينەتاقى تولەمدەرىنىڭ ورتاشا مولشەرى (ونىڭ ىشىندە بازالىق زەينەتاقى) 2021 جىلعى 1 شىلدەدەگى جاعداي بويىنشا 99 898 تەڭگەنى قۇرادى" دەلىنگەن مينيسترلىك تاراتقان حابارلامادا.

ەسكە سالا كەتەيىك، 2018 جىلدىڭ 1 شىلدەدەن باستاپ مەملەكەتتىك بازالىق زەينەتاقى تولەمى، ونىڭ زەينەتاقى جۇيەسىندەگى تاجىريبەسىن ەسكەرە وتىرىپ، ءار الۋشىعا جەكە تاعايىندالادى.

بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر (بۇدان ءارى - مزج) زەينەتاقى جۇيەسىندەگى ەڭبەك وتىلىنە قوسىلادى.

ەگەر زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولسا، سونداي-اق ەگەر مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى، سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى، ەگەر ءسىز 20 جىل قاتىسساڭىز، بازالىق زەينەتاقى كۇنكورىس دەڭگەيى قۇنىنىڭ 74%-دى، 30 جىل – كۇنكورىس قۇنىنىڭ 94%-ىن قۇرايدى. 33 جانە ودان دا كوپ جىل جۇمىس ءوتىلى بولسا، كۇنكورىس قۇنىنىڭ 100% جوعارى مولشەرىندە بەلگىلەنەدى.

ەگەر ءبىر اي ىشىندە مزج بىرنەشە رەت ءبىرىڭعاي جيناقتاۋشى زەينەتاقى قورىنا جاسالسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.

وسىلايشا، مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا، زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.

ءوز كەزەگىندە، جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدە الىنعان ورتاشا ايلىق تابىسقا بايلانىستى بولادى.