پاۆلودار وبلىسى ەكىباستۇز اۋىلدىق وكرۋگىنە قاراستى بەس اۋىلدىڭ اكىمى تارتىپتىك جاۋاپكەرشىلىككە تارتىلعانىنا قاراماستان الداعى سايلاۋعا قاتىسۋعا رۇقسات العان. بۇل تۋرالى kerek.pv instagram پاراقشاسىندا حابارلاندى.

پاراقشاداعى جازبادا جۋرناليست پەن ايماقتىق سايلاۋ كوميسسياسىنىڭ ءتوراعاسى سانسىزباي تولەۋبايەۆ ەكەۋىنىڭ اڭگىمەسى جاريالانعان. 

جۋرناليست سانسىزباي تولەۋبايەۆتان "اۋىلدىق وكرۋگكە قاراستى بەس اۋىل اكىمى الداعى سايلاۋعا قاتىسا ما؟" دەپ سۇرايدى. سانسىزباي تولەۋبايەۆ بىرنەشە جىل قىزمەت ەتكەن اكىمدەردى سايلاۋعا جىبەرمەۋ دۇرىس بولمايتىنىن، سوندىقتان ەكىباستۇز اۋىلدىق وكرۋگىندەگى بەس اكىمگە سايلاۋعا تۇسۋگە مۇمكىندىك بەرىلگەنىن ايتادى.

جۋرناليست جۋىردا عانا تارتىپتىك جازاعا تارتىلعان اكىمدەر قالاي عانا سايلاۋعا قاتىستىرىلعالى جاتقانىنا تاڭدانىس ءبىلدىرىپ، مۇنىڭ سەبەبىن ءتۇسىندىرۋدى وتىنەدى.

سايلاۋ كوميسسياسىنىڭ ءتوراعاسى اكىمدەردىڭ سايلاۋعا قاتىسۋعا جىبەرىلۋى زاڭعا قايشى ەمەس ەكەنىن، مەملەكەتتىك قىزمەت جونىندەگى اگەنتتىك رۇحسات بەرگەنىن جەتكىزگەن. 

مەملەكەتتىك قىزمەت وتكەرۋدىڭ كەيبىر ماسەلەلەرى تۋرالى پرەزيدەنتتىڭ 2015 جىلعى 29 جەلتوقسانداعى № 152 جارلىعىنا ساي، مەملەكەتتىك قىزمەتكە نۇقسات كەلتىرگەن ارەكەتى ءۇشىن سوڭعى ءۇش جىلدا تارتىپتىك جاۋاپكەرشىلىككە تارتىلعان ازامات مەملەكەتتىك قىزمەتكە تاعايىندالماۋى كەرەك.

الەۋمەتتىك جەلىدەگى جازبادا سايلاۋعا تۇسكەلى وتىرعان بەس اكىم "ەڭبەك" باعدارلاماسىن جۇزەگە اسىرۋ بارىسىندا زاڭ بۇزۋشىلىققا جول بەرگەنى ءۇشىن تارتىپتىك جازاعا تارتىلعانى، ولاردىڭ كەيبىرى اۋىلدىق ەلدىمەكەندى 8 جىلدان بەرى باسقارىپ كەلسە، ءبىرى 21 جىلدان بەرى قىزمەتىندە وتىرعانى ايتىلادى.