قازاقستاننىڭ ون ەكى ءوڭىرى كوروناۆيرۋستىڭ تارالۋ دەڭگەيى بويىنشا "قىزىل" ايماقتا. بۇل تۋرالى COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيا حابارلادى.
كوروناۆيرۋس ينفەكسياسى بويىنشا قازاقستان وڭىرلەرىندەگى ەپيدەميولوگيالىق احۋالدى باعالاۋ ماتريساسىنا سايكەس، نۇر-سۇلتان، الماتى، شىمكەنت قالالارى، اقمولا، اقتوبە، اتىراۋ، باتىس قازاقستان، قاراعاندى، قوستاناي، ماڭعىستاۋ، پاۆلودار جانە سولتۇستىك قازاقستان وبلىستارى "قىزىل" ايماقتا تۇر.
الماتى، جامبىل جانە قىزىلوردا وبلىستارى "سارى" ايماقتا ورنالاسقان.
ال "جاسىل" ايماقتا تۇركىستان جانە شىعىس قازاقستان وبلىستارى تۇر.
قازاقستاندا وتكەن تاۋلىكتە 4375 ادامدا كوروناۆيرۋس ىندەتى پتر ارقىلى راستالدى. 167 ادام پنيەۆمونيا جۇقتىرعان.
12 شىلدەدەگى مالىمەت بويىنشا كوروناۆيرۋستان 56 ادام، پنيەۆمونيادان ءۇش ناۋقاس كوز جۇمعان.
ەل بويىنشا كوروناۆيرۋسقا تاپسىرعان تەستى وڭ ناتيجە كورسەتكەن جاعدايلار سانى 466 792-گە جەتتى. ونىڭ ىشىندە 4769 ادام قايتىس بولعان. كوروناۆيرۋس بەلگىلەرى بار پنيەۆمونيامەن اۋىرعانداردىڭ رەسمي سانى – 58 086. ونىڭ 3504ء-ى كوز جۇمعان.
ۆيرۋستىڭ تارالۋى اسىرەسە نۇر-سۇلتان (1128)، الماتى (640)، شىمكەنت (342) قالالارىندا، قاراعاندى (589)، اتىراۋ (320)، باتىس قازاقستان وبلىستارىندا (187) ءورشىپ تۇر.
14 شىلدەدەگى مالىمەت بويىنشا، 45 282 ادام كوروناۆيرۋس پەن پنيەۆمونيادان ەمدەلىپ جاتىر. ولاردىڭ ىشىندە 14 698 پاسيەنت ستاسيوناردا، 30 584 ناۋقاس امبۋلاتوريالىق دەڭگەيدە ەم قابىلداۋدا.
ىندەتكە شالدىققاندار اراسىندا 880 ادامنىڭ جاعدايى اۋىر، 198 پاسيەنتتىڭ جاعدايى وتە اۋىر، 116 ناۋقاس ءوجج اپپاراتىندا جاتىر.
14 شىلدەدەگى مالىمەت بويىنشا ەلدە 4 601 830 ادام ۆاكسينانىڭ I كومپونەنتىن سالدىرعان، II كومپونەنت 2 541 853 ادامعا ەگىلگەن.
پىكىر قالدىرۋ