ماعان ەرىك بەرىلسە، بارلىعىنا ۆاكسينا سالدىراتىن ەدىم. بۇلاي دەپ دەنساۋلىق ساقتاۋ مينيسترلىگى الەكسەي سوي "ۆرەميا" گازەتىنە بەرگەن سۇحبات بارىسىندا ايتتى.

ول كۇزگە دەيىن 10 ميلليون ادام ۆاكسينا سالدىرىپ ۇلگەرەدى دەگەنگە ءالى دە ۇمىتپەن قارايتىنىن، ءبىراق قازاقستان قۇقىقتىق مەملەكەت بولعاندىقتان، ەشكىمدى ماجبۇرلەي المايتىنىن، ازاماتتار ۆاكسينا سالدىرۋعا سانالى تۇردە كەلگەنىن قالايتىنىن جەتكىزدى.

سونداي-اق ول كۇزگە دەيىن 10 ميلليون ادام ۆاكسينا سالدىرىپ ۇلگەرمەسە كرەسلوسىنان ايىرىلىپ قالۋدان قورىقپايتىنىن اتاپ ءوتتى.

– ماسەلەنى بارلىعى كارەراعا اكەپ تىرەگىسى كەلەدى. ءبىز ادامدارعا ۆاكسينانى كۇشتەپ سالعىزا المايمىز. تەك مەيلىنشە تۇسىندىرەمىز. مەن تاعايىندالعالى وكىنىشكە قاراي، وتباسىمدى كورمەيمىن. ءبىزدىڭ ۇجىم تاۋلىك بويى جۇمىس ىستەيدى. كوۆيدتەن بولەك كوپتەگەن جۇيەلى ماسەلەلەردى شەشۋمەن شۇعىلدانامىز. ال قىزمەتتى باسشىلىقتىڭ سەنىمى دەپ قابىلدايمىن. پايدامىزدى تيگىزىپ تۇرعاندا جۇمىستى ىستەي بەرەمىز. مينيستر كرەسلوسىن جوعالتۋدان قورىقپايمىن. كەز كەلگەن تاعايىنداۋدىڭ باسى مەن سوڭى بولادى، – دەدى ول.

بۇعان دەيىن الەكسەي سوي قىركۇيەككە دەيىن 10 ميلليون ادامدى ۆاكسينالاۋ جوسپارلانىپ وتىرعانىن مالىمدەگەن ەدى. الايدا جوسپار ورىندالماي ءتۇرى بار. 22 شىلدەدەگى مالىمەتكە ساي، قازاقستاندا 5 009 408 ادام ۆاكسينانىڭ ءبىرىنشى كومپونەنتىن، 2 992 214 ادام ەكىنشى كومپونەنتىن سالدىرعان.