قازاقستاندا ءۇشىنشى ەلدەردەن سەمەنت اكەلۋگە سالىنعان تىيىم 2021 جىلعى 23 شىلدەدەن باستاپ الىنىپ تاستالدى. وسىلايشا، سەمەنتتى كلينكەرلەر، پورتلاندسەمەنت، وزگە دە پورتلاندسەمەنت، گلينوزەمدى سەمەنت، گيدراۆليكالىق سەمەنتتەر ءۇشىنشى ەلدەردەن جەتكىزىلە الادى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى حابارلادى.

"يمپورتقا سالىنعان تىيىمدى الىپ تاستاۋ باتىس وڭىرلەردە نارىقتى مولىقتىرىپ، رەسپۋبليكا اۋماعىندا سەمەنت ونىمدەرىنىڭ باعاسى تومەندەيدى. وتاندىق سەمەنت وندىرۋشىلەردى قولداۋ ءۇشىن يندۋستريا جانە ينفراقۇرىلىمدىق دامۋ مينيسترلىگى ءۇشىنشى ەلدەردەن سەمەنت يمپورتىنا تىيىم سالۋ تۋرالى 2021 جىلعى 30 ساۋىردەگى №216 بۇيرىق شىعارعان ەدى. الايدا، قوعامدا سەمەنت باعاسىنىڭ وسۋىنە جانە ونىڭ ىشكى نارىقتاعى جەتىسپەۋشىلىگىنە قاتىستى ماسەلەلەر پايدا بولدى. وسىعان وراي مينيسترلىك سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ قاراۋىنا اتالعان تىيىمدى جويۋ تۋرالى بۇيرىق جوباسىن ۇسىندى. ءۇشىنشى ەلدەردەن سەمەنت اكەلۋگە سالىنعان تىيىمدى جويۋ تۋرالى بۇيرىق اككرەديتتەلگەن ۇيىمدارمەن كەلىسىلىپ، قوعامدىق كەڭەستىڭ وڭ قورىتىندىسىن العانىن ايتا كەتۋ كەرەك" دەلىنگەن مينيسترلىك مالىمدەمەسىندە.

قازاقستاندا مامىردان باستاپ سەمەنت باعاسى ايتارلىقتاي وسكەن. مامىردىڭ باسىندا م-400 ماركالى سەمەنتتىڭ قابى 1100 تەڭگەدەن ساتىلسا، ءقازىر باعا 1650-1700 تەڭگەدەن باستالادى.