مەملەكەتتىك جانە جەرگىلىكتى باسقارۋدى دامىتۋ تۇجىرىمداماسى، راسىمدىك-پروسەستىك سوتتار جۇمىسىنىڭ باستالۋى، سونداي-اق اۋىل اكىمدەرىن سايلاۋ. وسى جانە وزگە دە وزەكتى ماسەلەلەر "Nur Otan" پارتياسى جانىنىداعى ازاماتتىق قوعامدى جانە مەملەكەتتىك باسقارۋدى دامىتۋ جونىندەگى رەسپۋبليكالىق قوعامدىق كەڭەس وتىرىسىندا تالقىلاندى، دەپ حابارلادى پارتيانىڭ باسپا ءسوز قىزمەتى.

اۋىل اكىمدەرىنىڭ سايلاۋىنا "Nur Otan" پارتياسىنان 584 كانديدات قاتىسىپ وتىرعانى بەلگىلى. بۇگىن ۇگىت-ناسيحات جۇمىستارى اياقتالادى. ونىڭ اياسىندا 45 مىڭنان استام ءىس-شارا وتكىزىلىپ، 228 مىڭنان استام ۇگىت ماتەريالى تاراتىلدى. جالپى، 1،2 ملن سايلاۋشى قامتىلدى.

– ەلىمىزدە العاش رەت وتكىزىلىپ وتىرعان اۋىل اكىمدەرىنىڭ تىكەلەي سايلاۋىنا دەگەن حالىقتىڭ كوزقاراسى وڭ. ازاماتتاردىڭ قىزىعۋشىلىعى جوعارى ەكەنىن بايقاپ وتىرمىز، – دەدى كەڭەس ءتوراعاسى، ءماجىلىس دەپۋتاتى ايدوس سارىم.

ءوز كەزەگىندە ۇلتتىق ەكونوميكا ۆيسە-مينيسترى الىبەك قۋانتىروۆ جەرگىلىكتى ءوزىن-وزى باسقارۋدى دامىتۋعا سايلاۋدان وزگە، 2025 جىلعا دەيىن جۇرگىزىلەتىن مەملەكەتتىك باسقارۋ جانە جەرگىلىكتى ءوزىن-وزى باسقارۋ دەڭگەيلەرى اراسىنداعى وكىلەتتىكتەردى ورتالىقسىزداندىرۋ ىقپال ەتەتىنىن اتاپ ءوتتى.

– جەرگىلىكتى ءوزىن-وزى باسقارۋ ينستيتۋتىنىڭ الەۋەتىن ەسكەرە وتىرىپ، "جەرگىلىكتى ءوزىن-وزى باسقارۋ تۋرالى" زاڭ جوباسىنداعى بولىمدەردىڭ ءبىرى – قوعامدىق ورىنداردى اباتتاندىرۋ جانە سىرتقى بەزەندىرۋ، كورمە-جارمەڭكەلىك قىزمەتتى ۇيىمداستىرۋ، قابىرلەرگە ارنالعان جەر ۋچاسكەلەرىن ەسەپكە الۋ جانە تىركەۋ، كوممۋنالدىق قالدىقتاردى بولەك جيناۋدى ۇيىمداستىرۋ ماسەلەلەرىن شەشۋ جونىندەگى قىزمەتتەردى اۋداندىق دەڭگەيدەن اۋىل دەڭگەيىنە بەرۋ، – دەدى الىبەك قۋانتىروۆ.

سونداي-اق، كەڭەس مۇشەلەرى مەملەكەت باسشىسى قاسىم-جومارت توقايەۆتىڭ اكىمشىلىك ادىلەت جۇيەسىن ەنگىزۋ تۋرالى تاپسىرماسىن ورىنداۋ بارىسىن تالقىلادى.

جوعارعى سوتتىڭ اكىمشىلىك ىستەر جونىندەگى سوت القاسىنىڭ سۋدياسى اسلان تۇكييەۆ ايتىپ وتكەندەي، بارلىق 17 وڭىردە جانە قاسكەلەڭ، سەمەي، جەزقازعان، ەكىباستۇز قالالارىندا مامانداندىرىلعان اۋدانارالىق اكىمشىلىك سوتتار (ءمااس) ءوز جۇمىسىن باستادى. ول جاڭا سوت ورگانىنىڭ باستى ەرەكشەلىگىن ءتۇسىندىردى.

– ازاماتتىق پروسەستەن ايىرىماشىلىعى كوبىنە جاۋاپكەر مەملەكەتتىك ورگان بولاتىن اكىمشىلىك پروسەستەردە تالاپكەر جاعى ءالسىز. سوندىقتان اكىمشىلىك سوتتاردا سۋدياعا مەملەكەتتىك ورگانمەن داۋ كەزىندە تالاپكەرگە كومەكتەسۋگە رەسمي تۇردە رۇقسات ەتىلگەن. ماسەلەن، سۋديا تالاپ قويۋشىمەن بىرگە تالاپ-ارىز جازادى، قاجەت بولعان جاعدايدا، ەگەر تالاپكەردىڭ ءوزى وبەكتيۆتى سەبەپتەرمەن ولاردى ۇسىنا الماسا، دالەلدەمەلەر جيناۋعا كومەكتەسەدى. ال دالەلدەۋ اۋىرتپالىعى تولىعىمەن جاۋاپكەردىڭ جاعىنا جۇكتەلگەن، – دەدى اسلان تۇكييەۆ.

سونداي-اق جوعارعى سوتتىڭ سۋدياسى 1 شىلدەدەن باستاپ ءمااس-قا 1181 تالاپ-ارىز تۇسكەنىن، ونىڭ باسىم بولىگى جەر، سالىق ماسەلەلەرىنە، مەملەكەتتىك ساتىپ الۋلارعا جانە سوت ورىنداۋشىلارىنىڭ ارەكەتتەرىنە قاتىستى ەكەنىن ايتتى.

سونىمەن قاتار، كەڭەس مۇشەلەرى جۇمىسشىلاردىڭ كەيبىر ساناتتارىنا جەتكىلىكتى دەڭگەيدە كوڭىل بولىنبەيتىنىن العا تارتتى. كەڭەس ءتوراعاسى ايدوس سارىم وقۋ ورىندارىنىڭ اكىمشىلىك قىزمەتشىلەرىنە قاتىستى ماسەلەنى كوتەردى.

– "پەداگوگ مارتەبەسى تۋرالى" زاڭ قابىلدانعاننان كەيىن مۇعالىمدەردىڭ ەڭبەك جانە الەۋمەتتىك جاعدايلارى ايتارلىقتاي جاقساردى. الايدا مەكتەپتەردە ءبىلىم وشاعىنىڭ ومىرىنە تىكەلەي ارالاساتىن، ءبىراق وگەيدىڭ كۇيىن كەشىپ وتىرعان جۇمىسشىلار بار، – دەدى ول.

وسىعان بايلانىستى ايدوس سارىم زاڭنامادا ماڭىزدى مەملەكەتتىك قىزمەت اتقاراتىن، ءبىراق مەملەكەتتىك باعدارلامالارعا قاتىسا المايتىن كوممۋنالدىق قىزمەتشىلەر مارتەبەسىن بەكىتۋدى ۇسىندى.

– ءبىر عانا الماتىنىڭ وزىندە ەشقانداي مارتەبەسى جوق 10 مىڭعا جۋىق ادام بار. ولار قالالىق سۋ ارناسىنىڭ، ەنەرگوسبىت جانە ت.ب. قىزمەتكەرلەرى. مىسالى، ولار جەڭىلدەتىلگەن يپوتەكا الۋ ءۇشىن "وتباسى بانك" باعدارلامالارىنا قاتىسا المايدى. بۇل جەردە ورتالىق جانە جەرگىلىكتى اتقارۋشى ورگاندار ءتيىستى ۇسىنىستار ەنگىزۋى كەرەك، – دەدى ول.

وتىرىس قورىتىندىسى بويىنشا كەڭەس مۇشەلەرى مەملەكەتتىك ورگاندارعا ءبىرقاتار ۇسىنىمدار ازىرلەدى. ولاردىڭ ىشىندە زاڭنامادا كوممۋنالدىق قىزمەتشىلەر مارتەبەسىن بەكىتۋ، "حالىق ۇنىنە قۇلاق اساتىن مەملەكەت" تۇجىرىمداماسىن ورىنداۋ بويىنشا مەملەكەتتىك ورگانداردىڭ اۋقىمدى رەيتينگىن ەنگىزۋ جانە مەملەكەتتىك قىزمەتشىلەردى وقىتۋدا ازاماتتىق قوعامنىڭ الەۋەتىن پايدالانۋ.