بۇگىن اۋىل اكىمدەرىن سايلاۋ قارساڭىندا ماڭعىستاۋ وبلىسىنداعى «ازاماتتىق اليانس» ۇكىمەتتىك ەمەس ۇيىمنىڭ باسشىسى جىبەك احمەتوۆا پىكىر ءبىلدىردى، - دەپ حابارلايدى mangystaumedia.kz سايتى.

«بيىل اۋىل تۇرعىندارى سايلاۋعا بەلسەندى قاتىسۋى كەرەك. سەبەبى، ەلدە ءبىرىنشى رەت ءوتىپ وتىر. ەكىنشىدەن، كوپتەن بەرى ەل اراسىندا «اۋىل اكىمدەرى دۇرىس جۇمىس ىستەمەيدى»، «اۋىلدىڭ دامۋ قارقىنى تومەن»، «شەشىمى تاپپاعان ماسەلە كوپ» دەگەندى ءجيى ەستيمىز. ال اتالعان ماسەلەنى شەشۋدە اۋىل اكىمىنىڭ اتقارار ءرولى ماڭىزدى. سوندىقتان اۋىل تۇرعىندارى بۇگىنگى مۇمكىندىكتى جىبەرىپ الماي، سايلاۋعا جاۋاپكەرشىلىكپەن قاتىسۋى قاجەت»، - دەيدى جىبەك احمەتوۆا.

ونىڭ ايتۋىنشا، اتالعان شارا جەرگىلىكتى تۇرعىنداردىڭ سايلاۋعا قاتىسۋ مادەنيەتىن قالىپتاستىرۋعا سەپتىگىن تيگىزەدى.

«وسى ۋاقىتقا دەيىن تۇرعىندار سايلاۋداعى داۋىسىنىڭ ماڭىزدى ەكەنىنە نازار اۋدارماعان ەدى. ال ءقازىر ءاربىر اۋىل تۇرعىنىنىڭ داۋىسى مەن تاڭداۋى وتە ماڭىزدى. بۇگىنگى اۋىل اكىمى، ەرتەڭگى اۋدان اكىمى بولۋى دا مۇمكىن. سوندىقتان، ءبىز، اۋىل اكىمدەرىن قانشالىقتى دۇرىس سايلاساق، بولاشاق تا سونشالىقتى جارقىن بولادى. سونداي-اق ءوز كەزەگىندە ءوڭىردىڭ العا جىلجۋىنا، ەكونوميكاسى مەن الەۋمەتتىك احۋالىنا سەپتىگىن تيگىزەرى انىق. ەگەر اۋىل حالقى ءوز اكىمىن سايلايتىن بولسا، وندا اكىم جاۋاپكەرشىلىك جۇگىن ارقالاپ، تياناقتى ءىس تىندىرۋعا تىرىسادى. حالىقتىڭ تاڭداۋىمەن سايلانعان اكىم سول اۋىلدىڭ دامۋى ءۇشىن بار كۇش-جىگەرىن جۇمسايتىنى ءسوزسىز. ياعني، اكىمدى سايلايتىن دا، سايلانعان سوڭ ەسەپ سۇرايتىن دا حالىق ەكەنىن ۇمىتپايدى»، - دەيدى جىبەك احمەتوۆا.