توكيوداعى وليمپيادا ويىندارىندا شۆەسيالىق قارسىلاسىن ۇتقان قازاقستاندىق تەننيسشى ەلەنا رىباكينا جارىستان العان اسەرىمەن ءبولىستى. بۇل تۋرالى Olympic.kz سايتى حابارلادى.

– بۇگىنگى وينىم جامان ەمەس. ءبىرىنشى سەتتىڭ باسىندا ازداپ اسىعىپ، ءبىرقاتار قاتەلىكتەرگە بوي الدىردىم. ءبىراق، جالپى العانداعى ناتيجەم كوڭىلدەن شىعادى. كۇن رايى دا جاقسىراق، الايدا، اۋاداعى ىلعال ءالى بار. جاڭا دوپتى اۋىستىرعاندا دا قيىندىق تۋدى، اسەرى باسقاشا. ۋيمبلدوننان سوڭ ءبىر اپتاداي ءۇزىلىس الدىم. سول سەبەپتى جاقسى دايىندىقپەن كەلدىم. فيزيكالىق تۇرعىدان دا ءوزىمدى جاقسى سەزىنەمىن. كەلەسى ماچقا دايىندالامىن، – دەدى رىباكينا. 

بۇگىن قازاقستاندىق تەننيسشى ەكىنشى اينالىمدا شۆەسيا وكىلى رەبەككا پەتەرسونمەن كەزدەسكەن بولاتىن. ەكى سەتكە سوزىلعان ماچتا رىباكينا 6:2، 6:3 ەسەبىمەن جەڭىسكە جەتتى. كەزدەسۋ 1 ساعات 14 مينۋتقا سوزىلعان. 

ەلەنا رىباكينا تەننيستەن قازاقستان ايەلدەر كومانداسىنىڭ توكيو وليمپياداسىندا قالعان جالعىز وكىلى. بۇعان دەيىن زارينا دياس، ياروسلاۆا شۆەدوۆا جانە يۋليا پۋتينسيەۆا جارىستى جالعاستىرۋدان باس تارتقان.