ەل پرەزيدەنتى قاسىم-جومارت توقايەۆتىڭ باستاماسىمەن قولعا الىنعان اۋداندىق ماڭىزى بار قالالار، اۋىلدار، كەنتتەر مەن اۋىلدىق وكرۋگتەر اكىمدەرىنىڭ العاشقى تىكەلەي سايلاۋىنىڭ قورىتىندىسى بويىنشا «Nur Otan» پارتياسىنىڭ كانديداتتارى جانە ءوزىن-وزى ۇسىنۋشى پارتيا مۇشەلەرى وكرۋگتەردىڭ 86%-دان استامىندا جەڭىسكە جەتتى. اۋماقتىق سايلاۋ كوميسسيالارىنىڭ مالىمەتتەرى بويىنشا، پارتيانىڭ 627 كانديداتى اكىم بولىپ سايلاندى، ونىڭ ىشىندە 65ء-ى – ءوزىن-وزى ۇسىنۋشى نۇروتاندىقتار.

پارتيانىڭ باسپا ءسوز قىزمەتى حابارلاعانداي، ۇگىت-ناسيحات كەزەڭىندە «Nur Otan» كانديداتتارى 1،2 ملن سايلاۋشىنى قامتىعان. 45 مىڭنان استام كەزدەسۋ مەن ءىس-شارا وتكىزىلدى. ولاردىڭ ۇشتەن ءبىر بولىگى ونلاين فورماتتا بولسا، قالعاندارى سانيتارلىق تالاپتاردى ساقتاي وتىرىپ جۇزەگە استى. 228 مىڭ ۇگىت ماتەريالى تاراتىلدى. ۇگىت-ناسيحات بارىسىندا پارتيانىڭ قوعامدىق قابىلداۋ بولمەلەرىنە 1،5 مىڭ ءوتىنىش كەلىپ ءتۇسىپ، ولار جەرگىلىكتى جەرلەردە جەدەل شەشىلدى.

جەڭىسكە جەتكەن نۇروتاندىقتاردىڭ 35%-دان استامى – جاڭا تۇلعالار، ونىڭ ىشىندە ءبىلىم بەرۋ سالاسىنىڭ وكىلدەرى، كاسىپكەرلەر، فەرمەرلەر، ال 65%-ى قىزمەتتەگى اكىمدەر. كانديداتتاردىڭ ورتاشا جاسى – 46 جاستى قۇرادى. ايەلدەر – 11،5%، 35 جاسقا دەيىنگى جاستار – 14،2%. كوپشىلىگى باستاۋىش پارتيا ۇيىمدارىنىڭ ءتوراعالارى مەن تاياۋدا وتكەن پارتياىشىلىك پرايمەريزدىڭ قاتىسۋشىلارى.

بارلىق كانديداتتار مەن شتاب مۇشەلەرى بۇعان دەيىن پارتيانىڭ ساياسي مەنەدجمەنت مەكتەبى بازاسىندا سەمينارلاردان ءوتىپ، قاجەتتى ۇيىمداستىرۋشىلىق، ادىستەمەلىك جانە باسقا دا قولداۋمەن قامتاماسىز ەتىلگەنىن ايتا كەتكەن ءجون. ءارقايسىسىندا اۋماقتىڭ مۇمكىندىگىن ەسكەرە وتىرىپ، پارتيانىڭ قولداۋىمەن ءتيىستى رەسۋرستارمەن قامتاماسىز ەتىلگەن ءوز سايلاۋالدى باعدارلاماسى بولدى.

«پارتيامىزدىڭ ليدەرى نۇرسۇلتان ءابىش ۇلى نازاربايەۆ ايتقانداي، نۇروتاندىقتاردىڭ باستى قاعيداتتارى – جاۋاپكەرشىلىك، كوماندالىق رۋح، پارتيا يدەالدارى مەن قۇندىلىقتارىنا بەرىكتىك. «Nur Otan»-نىڭ مىندەتى – تەك سايلاۋدا جەڭىسكە جەتۋ عانا ەمەس، اۋىلداردىڭ دامۋىنا جۇيەلى جاعداي جاساۋ، ازاماتتاردىڭ ناقتى ماسەلەلەرىن شەشۋ. پارتيا ءوز كانديداتتارىن ۇسىنا وتىرىپ، ءبىرىنشى بۋىن اكىمدەردىڭ ەل پرەزيدەنتى قاسىم-جومارت توقايەۆ ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسى اياسىندا حالىقپەن ءوزارا ارەكەتتەستىگىنىڭ جاڭا مادەنيەتىن قالىپتاستىرا وتىرىپ، زاماناۋي تاسىلدەردى ەندىرۋدە» - دەپ بۇعان دەيىن اتاپ وتكەن ەدى پارتيا ءتوراعاسىنىڭ ءبىرىنشى ورىنباسارى باۋىرجان بايبەك Facebook پاراقشاسىندا.