دەنساۋلىق ساقتاۋ ءمينيسترى الەكسەي سوي ورتالىق كوممۋنيكاسيالار قىزمەتىندە وتكەن بريفينگتە ءبىرقاتار وڭىرلەردەگى كوۆيدتىك ستاسيونارلاردا ورىن تولىق ەكەنىن، بۇل دەنساۋلىق ساقتاۋ جۇيەسىنىڭ شامادان تىس جۇكتەمەسىنە الىپ كەلەتىنىن مالىمدەدى.

ونىڭ ايتۋىنشا، الدىڭعى ەكى اپتامەن سالىستىرعاندا سوڭعى ەكى اپتادا رەسپۋبليكا بويىنشا بارلىق وڭىرلەردە سىرقاتتانۋدىڭ ءوسۋى بايقالادى. ماۋسىم ايىمەن سالىستىرعاندا ورتاشا تاۋلىكتىك سىرقاتتانۋ دەڭگەيى 5،2 ەسە وسكەن. 1 شىلدەمەن سالىستىرعاندا ەلدە ينفەكسيالىق جانە رەانيماسيالىق توسەك-ورىنمەن قامتۋ 3 ەسە ۇدەمەلى تۇردە وسكەن.

28 شىلدەدەگى جاعداي بويىنشا رەسپۋبليكا بويىنشا ينفەكسيالىق توسەك-ورىندارمەن قامتۋ 53%-دى، رەانيماسيالىق توسەك-ورىندارمەن قامتۋ 43%-دى قۇراعان. الماتى، شىمكەنت قالالارىندا، اقتوبە، تۇركىستان جانە قىزىلوردا وبلىستارىندا ينفەكسيالىق جانە رەانيماسيالىق توسەك-ورىنمەن قامتۋدىڭ جوعارى قارقىنى بايقالادى.

بۇگىنگى كۇنى ەل بويىنشا 90 مىڭعا جۋىق ادام ناۋقاس، ونىڭ 25 مىڭعا جۋىعى ستاسيونارلاردا، 65 مىڭعا جۋىعى امبۋلاتوريالىق ەم الۋدا. شىلدە ايىنىڭ باسىمەن سالىستىرعاندا اۋىر ناۋقاستاردىڭ سانى 2،1 ەسە وسكەن. 1000-عا جۋىق ناۋقاس وكپەنى جاساندى جەلدەتۋ اپپاراتتارىنا قوسىلعان. ءمينيستردىڭ ايتۋىنشا، نۇر-سۇلتان، شىمكەنت قالالارى جانە ءبىرقاتار وبلىستاردا ينفەكسيالىق جانە رەانيماسيالىق توسەك-ورىن تاپشىلىعى بولۋى مۇمكىن.

مينيستر ناۋقاستاردىڭ 99،9%-ى ۆاكسيناسيالانباعانىن، بۇل يممۋنداۋدىڭ قاۋىپسىزدىگى مەن تيىمدىلىگىن راستايتىنىن اتاپ ءوتتى.

– ءاربىر قازاقستاندىقتان ۆاكسيناسيالاۋ تۋرالى سانالى شەشىم قابىلداۋدى، ءوزىن، جاقىندارىن قورعاۋدى جانە ەلىمىزدە ۇجىمدىق يممۋنيتەتتى قالىپتاستىرۋعا ءوز ۇلەسىن قوسۋدى سۇرايمىن. كوروناۆيرۋستىڭ تۇراقتى تۇردە بولا بەرەتىن مۋتاسياسى كەزىندە بۇل قورعانۋدىڭ جالعىز جولى، – دەدى ا. سوي.