الماتىنىڭ باس سانيتار دارىگەرى جانداربەك بەكشين قالادا ەپيدەميولوگيالىق جاعداي كۇردەلەنىپ جاتقانىن مالىمدەدى. 

– پاندەميا باستالعالى قالا ءۇش تولقىننان ءوتتى، ءقازىر ءتورتىنشى تولقىنعا كىرىپ جاتىرمىز. سوندىقتان قالاداعى ەپيدەميولوگيالىق جاعداي كۇردەلەنىپ جاتىر. سوڭعى اپتانى الساق، وتكەن اپتامەن سالىستىرعاندا ناۋقاستار سانى 5790-نان 8393-كە  دەيىن ءوستى، – دەدى ول. 

بەكشيننىڭ ايتۋىنشا، 23 شىلدەدەن باستاپ ىندەت جۇقتىرعاندار سانى كۇنىنە مىڭنان اسۋدا. وتكەن تاۋلىكتە 1470 ادامعا جەتكەن. ال تامىزدا ءتورتىنشى تولقىن شارىقتاپ، قىركۇيەكتىڭ باسىندا اۋرۋ جۇقتىرعاندار سانى ازايادى.

– ءقازىر بار كۇشىمىزدى حالىقتى ۆاكسينالاۋعا باعىتتاپ جاتىرمىز. قالادا ۆاكسينانىڭ ءبىرىنشى كومپونەنتىن تۇرعىنداردىڭ 35،2 پايىزى سالدىردى. ءقازىر يممۋندىق قابات 34 پايىزدى كورسەتىپ وتىر، —دەدى باس سانيتار دارىگەر. 

سونىمەن قاتار ول 30 شىلدەدە جاڭا قاۋلى جاريالايتىنىن ايتتى. 

– بۇل قاۋلى 2-16 تامىز ارالىعىندا كۇشىندە بولادى. قۇجاتتى "اتامەكەن" ۇلتتىق  كاسىپكەرلىك باسقارماسىمەن تالقىلادىق. ءبىراق  تۇپكىلىكتى ۇسىنىستار مەن تالاپتاردى كۇتەمىز. اسىرەسە Ashyq جۇيەسى بويىنشا جۇمىس ىستەمەيتىن نىسانداردىڭ قىزمەتىن شەكتەۋىمىز كەرەك، –  دەدى بەكشين.