قازاقستاننىڭ 19 ميلليونىنشى تۇرعىنى بولعان جانيا ازامات قىزىنىڭ اتا-اناسىن الماتى وبلىسى اكىمىنىڭ ورىنباسارى ارسلان داندىبايەۆ  جەكە قۇتتىقتاپ، جانيانىڭ وتباسىنا ءبىر ميلليون تەڭگەنىڭ سەرتيفيكاتىن سىيعا تارتتى.

سونداي-اق  نارەستەگە اربا، بالاعا كۇتىم جاساۋعا ارنالعان زاتتار مەن جەمىس-جيدەك سالىنعان سەبەت تابىستالعان. ال جانيانىڭ ەكى ۇلكەن اپكەسىنە سمارتفون سىيعا بەرىلدى.

كەشە، 3 تامىزدا پرەزيدەنت قاسىم-جومارت توقايەۆ Twitter پاراقشاسىندا قازاقستان حالقىنىڭ سانى 19 ميلليونعا جەتكەنىن حابارلاعان. 

ۇلتتىق ستاتيستيكا بيۋروسىنىڭ حابارلاۋىنشا، جانيا ازامات قىزى 20 ماۋسىمدا الماتى قالاسىندا تۋعان وتباسىندا ءتورتىنشى بالا. حالىق ەسەبى دەرەكتەرىنە سايكەس ول قازاقستاننىڭ 19 ميلليونىنشى تۇرعىنى ەكەنى انىقتالدى. 

تۋۋ تۋرالى اكتىسىنە سايكەس، نارەستەنىڭ اتا-اناسى الماتى وبلىسى ىلە اۋدانى چاپايەۆو اۋىلىندا تۇرادى. اناسى 1986 جىلعى نازگۇل كوبەنتايەۆا، اكەسى 1982 جىلعى ازامات نۇرعالييەۆ.