ءبىلىم جانە عىلىم ءمينيسترى اسحات ايماعامبەتوۆ جاڭا وقۋ جىلىندا وقۋشىلارعا تەك مەكتەپ فورماسىن عانا ەمەس، كلاسسيكالىق ستيلدەگى كيىمدى دە كيۋگە رۇقسات بەردى. الايدا تىگىنشىلەر ءمينيستردىڭ بۇل شەشىمىنە نارازى، دەپ حابارلادى كتك ارناسى.

تىگىن كاسىپورنىنىڭ جەتەكشىسى سەرگەي سوكيركو ءمينيستردىڭ بۇل مالىمدەمەسىنە تىگىنشىلەر تاراپىنان نارازىلىقتار تۋىنداپ جاتقانىن جەتكىزدى.

– كۇتىپ جۇرگەنىمىز مۇلدەم باسقا جاڭالىق ەدى. بىلتىر جەڭىل ونەركاسىپتەگىلەردىڭ جارتىسىندا جۇمىس توقتادى. ەندى ءبىلىم ءمينيسترى بيىل قالعانىن قۇرتايىن دەپ وتىر. ميلليونداعان اقشامىزعا قانشاما شيكىزات ساتىپ الدىق. وتكەن جىلى تريكوتاج بەن ىسكەرلىك كيىمدەردى تىگىپ، ايتەۋىر امان قالعانبىز. ەندى ءقايتىپ كۇن كورەمىز؟!، –  دەيدى سەرگەي سوكيركو.

3 تامىز كۇنى اسحات ايماعامبەتوۆ facebook پاراقشاسىندا جاڭا وقۋ جىلىندا بالالارعا كلاسسيكالىق ستيلدەگى كيىم كيۋگە رۇقسات بەرىلەتىنىن مالىمدەگەن.

ايماعامبەتوۆتىڭ ايتۋىنشا، قازىرگى كەزدە دۇكەندەر بەلگىلى ءبىر ۋاقىتتا، ال كەيبىر قالالاردا جۇمىس كۇندەرى عانا ىستەيدى. ەگەر اتا-انالار بالالارعا مەكتەپ فورماسىن ساتىپ الۋ ءۇشىن ساۋدا ورتالىقتارى مەن دۇكەندەرگە جاپپاي باراتىن بولسا، وندا ۇزىن-سونار كەزەكتەر بولىپ، Covid-19 جۇقتىرۋ ءقاۋپى كۇشەيەدى. سونىمەن قوسا كەيبىر وتباسىلارعا مەكتەپ فورماسىن ساتىپ الۋ وتباسىلىق بيۋدجەتكە قوسىمشا جۇكتەمە بولۋى مۇمكىن.