بۇگىن «ەكپە ال دا، پاتەر ۇتىپ ال» ناۋقانى ءوز مارەسىنە جەتتى. باستى سىيلىق اقتاۋ قالاسىنان ەكى بولمەلى پاتەر قايرات قوسايەۆقا بۇيىردى، - دەپ حابارلادى mangystaumedia.kz سايتى.

ءبىر جارىم ايعا سوزىلعان ناۋقاننىڭ قورىتىندىسى «Mangystau» تەلەارناسىندا تىكەلەي ەفيردە ءوتتى. جەڭىمپاز اتانعان قايرات قوسايەۆ 94 جىلى تۋعان. اقتاۋ قالاسىنا تۇرىكمەنستاننان كوشىپ كەلگەن. ايتۋىنشا، قازىرگى تاڭدا ناعاشىسىنىڭ ۇيىندە تۇرىپ جاتىر. ال اتا-اناسى تۇرىكمەنستاننان كوشىپ كەلۋدى جوسپارلاپ وتىر.

«ۇيىمداستىرۋشىلارعا كوپ راقمەت. باستاپقى ۋاقىتتا بۇل ناۋقانعا سەنبەگەن ەدىم. ءقازىر شىنايى ەكەنىنە كوزىم جەتىپ وتىر. قۋانىشتىمىن. جەكە باسپانام جوق ەدى، ەندى اتا-انام اقتاۋعا كوشىپ كەلگەندە تۇراتىن ءۇيى دايىن. ءتىپتى، ءقازىر قۋانىشتان قوبالجىپ وتىرمىن»، - دەيدى جەڭىمپاز قايرات قوسايەۆ.

قايرات قوسايەۆتىڭ ايتۋىنشا، اقتاۋعا كەلگەنىنە 10 جىلداي ۋاقىت بولعان. وسىندا وقىپ، ءبىلىم العان. وسى ۋاقىتقا دەيىن «Carlsberg Kazakhstan» كومپانياسىندا مەرچەندايزەر بولىپ قىزمەت اتقارعان. الايدا، ەكى كۇن بۇرىن جۇمىستان شىعىپ كەتىپتى.

«كوپشىلىكپەن ءجيى بايلانىس ورناتىپ، تىعىز قارىم-قاتىناستا بولاتىندىقتان ەكپە الۋدى ءجون كوردىم. سەبەبى، پاندەميا كەزىندە ەركىن ءجۇرىپ، جۇمىس ىستەپ، اۋرۋدان امان بولۋدىڭ جالعىز امالى ۆاكسينا الۋ دەپ ويلايمىن. سوندىقتان دا ەرىكتى تۇردە ەكپە الدىم، ءارى قاراي وسى كونكۋرسقا قاتىسىپ، باعىمدى سىناپ كوردىم»، - دەيدى ول.

سونىمەن قاتار بۇگىن باعالى سىيلىقتاردىڭ سوڭعى لەگى تابىستالدى. ناتيجەسىندە قۇرىق اۋىلىنىڭ تۇرعىنى جەڭىس وڭعاربايەۆا ۇيالى تەلەفوندى ۇتىپ الدى. قىسقاتولقىندى پەش اقتاۋ قالاسىنىڭ تۇرعىندارى ەرلان بەكدەسىنوۆ جانە شىنار سابۋعالييەۆاعا بۇيىردى. ال تەلەديداردىڭ ءبىرىن ەركەبۇلان قايمەر السا، ەكىنشى تەلەديداردى اسەت ەلۋباي ەنشىلەدى. توڭازىتقىش ساليما سەيفۋللايەۆا ەسىمدى تۇرعىنعا بۇيىردى.

ەسكە سالا كەتەيىك، اتالعان ناۋقان 22 ماۋسىم كۇنى ءوڭىر كاسىپكەرلەرىنىڭ قولداۋىمەن باستالعان بولاتىن. ماقساتى – ەكپە العان تۇرعىنداردى ىنتالاندىرۋ. وسى ۋاقىتقا دەيىن 30-عا جۋىق تۇرعىن ءتۇرلى باعالى سىيلىقتارعا يە بولدى.

ۇيىمداستىرۋشىلاردىڭ ايتۋىنشا، تۇرعىندار تاراپىنان ۇسىنىستار تۇسەتىن بولسا، الداعى ۋاقىتتا اكسيانى جالعاستىرۋدى جوسپارلاپ وتىر.