قاراعاندى وبلىسىندا 500 ادام شاقىرىپ، قىزىنىڭ ۇزاتۋ تويىن جاساعان جەر قاتىناستارى باسقارماسىنىڭ باسشىسى قالەل ماقسۇتوۆ قىزمەتىنەن كەتتى. بۇل تۋرالى ءوڭىر اكىمدىگى جەڭىس قاسىمبەك ونلاين رەجيمىندە وتكەن اپپاراتتىق كەڭەستە حابارلادى.
– بۇگىنگى كۇننەن باستاپ جەر قاتىناستارى باسقارماسىنىڭ باسشىسى ماقسۇتوۆ قالەل مۇقاتاي ۇلى كارانتيندى ورەسكەل بۇزۋى، ياعني پاندەميا كەزىندە توي شارالارىن ۇيىمداستىرۋىنا بايلانىستى قىزمەتىنەن بوساتىلدى.
تاعى دا ەسكەرتەمىن: مۇنداي زاڭسىزدىقتار ءۇشىن جازا وتە قاتال بولادى. مۇندا مەملەكەتتىك قىزمەتكەردىڭ قىزمەتتىك ەتيكاسىنىڭ بارلىق نورماسى بۇزىلعان.
وبلىستا كوروناۆيرۋستىق ينفەكسياعا قارسى ءىس-قيمىل بويىنشا جۇرگىزىلىپ جاتقان ۇلكەن جۇمىستى قۇنسىزداندىرماڭىزدار. تۇرعىنداردىڭ كوڭىلىن قالدىرماڭىزدار.
مارتەبەلەرىڭىز نەمەسە جۇمىس ورنىنا قاراماستان ارەكەتتەرىڭىزگە جاۋاپ بەرەسىزدەر!”، – دەيدى وبلىس اكىمى جەڭىس قاسىمبەك.
وقيعا 7 تامىزدا بولعان. «109» نومىرىنە «اريستا» مەيرامحاناسىندا جاپپاي ءىس-شارا وتكىزىلىپ جاتقانى تۋرالى حابارلاما كەلىپ ءتۇستى.
وقيعا ورنىنا قاراعاندى قالاسىنىڭ پوليسيا، سانەپيدباقىلاۋ جانە اكىمدىك قىزمەتكەرلەرىنەن تۇراتىن ءموبيلدى توپ شىقتى.
مەكەمەنىڭ جانىندا كوپتەگەن كولىكتەر بولعاندىقتان جانە مەيرامحانانىڭ وزىندە 400-گە جۋىق ادام بولعاندىقتان، اۋماقتى قورشاۋ ءۇشىن پوليسيانىڭ قوسىمشا ناريادى شاقىرىلدى.
پىكىر قالدىرۋ