سانيتارلىق-ەپيدەميولوگيالىق باقىلاۋ كوميتەتى "قويۋ قىزىل" ايماقتاردا ساۋدا-ويىن-ساۋىق ورتالىقتارى 9 تامىزدان باستاپ قانداي رەجيممەن جۇمىس ىستەيتىنى تۋرالى اقپاراتتى جاريالادى.
سايتتا جاريالانعان اقپاراتقا سايكەس، "قويۋ قىزىل" ايماقتاردا 9 تامىزدان باستاپ "Ashyq كوشباسشىسى" مارتەبەسى بار نىساندارعا ساعات 00.00-گە دەيىن، "Ashyq" جۇيەسىندەگى باسقا نىساندارعا ساعات 22.00-گە دەيىن جۇمىس جاساۋعا رۇقسات بەرىلەدى.
باس سانيتار دارىگەردىڭ بۇعان دەيىنگى قاۋلىسىندا Ashyq جۇيەسىندەگى ساۋدا-ويىن-ساۋىق ورتالىقتارى "جاسىل" جانە "سارى" ايماقتاردا شەكتەۋسىز جۇمىس رەجيمىنە جىبەرىلسە، "قىزىل" ايماقتاردا سەنبى جانە جەكسەنبى كۇندەرى ساعات 10.00-دەن 22.00-گە دەيىن جۇمىس ىستەۋگە رۇقسات بەرىلگەن بولاتىن.
ال "قويۋ قىزىل" ايماقتا ساعات 07.00-دەن 20.00-گە دەيىن قىزمەت كورسەتە الاتىنى ايتىلعان ەدى. ەندىگى شەشىم بويىنشا اتالعان نىسانداردىڭ جۇمىس ۋاقىتى 2 ساعاتقا ۇزارتىلىپ وتىر دەگەن ءسوز.
2 تامىزدان باستاپ نۇر-سۇلتان، الماتى، شىمكەنت، اتىراۋ جانە قاراعاندى قالالارىندا "قويۋ قىزىل" ستاتۋسقا ساي شەكتەۋ شارالارى ەنگىزىلگەن.
"№33 بمسدق-نىڭ 11-تارماعىنا سايكەس ءتيىستى اۋماقتاعى كولىكتەگى باس مەملەكەتتىك سانيتاريالىق دارىگەرلەر "Ashyq" جوباسىن ىسكە اسىرۋ ماسەلەلەرى بويىنشا اتالمىش قاۋلىنى باسشىلىققا الادى جانە "جاسىل"، "سارى"، "قويۋ قىزىل" ايماقتارداعى جوباعا قاتىسۋشىلارعا قاتىستى كارانتيندىك شارالاردى قاتاڭداتۋ تۋرالى شەشىم قابىلداۋعا قۇقىلى ەمەس" دەلىنگەن حابارلامادا.
"قويۋ قىزىل" ايماق ستاتۋسى ءبىر اپتا ينفەكسيالىق توسەكتەردىڭ جۇكتەلىم كورسەتكىشى 70%-دان اسقان جانە 100 مىڭ تۇرعىنعا شاققاندا 200-دەن جوعارى بولعان وڭىرلەرگە بەرىلەدى.
پىكىر قالدىرۋ