ءبىلىم جانە عىلىم مينيسترلىگى "اقمەشىت" گۋمانيتارلىق-تەحنيكالىق ينستيتۋتى باس ليسەنزياسىنان ايىرىلعانىن مالىمدەدى.
بۇعان دەيىن جوو-دا تەكسەرۋ جۇرگىزىلىپ، ونىڭ قورىتىندىسى بويىنشا كوميتەت قىزمەتكەرلەرى ءتۇرلى بۇزۋشىلىقتاردى انىقتادى.
قىزىلوردا قالاسىنداعى "اقمەشىت" ينستيتۋتىنا ۇيعارىم بەرىلىپ، وقۋ ورنىنا بارلىق سايكەسسىزدىكتى جويۋعا ۋاقىت بەرىلدى. الايدا، جوعارى وقۋ ورنى بەرىلگەن ۋاقىتتى ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن قاجەتتى جۇمىستى جۇرگىزۋ ماسەلەسىنە ەمەس، سوت تالقىلاۋىنا جانە بعم كوميتەتىنىڭ ىس-ارەكەتتەرىنە شاعىمدانۋعا جۇمسادى.
– جوعارى وقۋ ورىندارىندا تەكسەرۋ جۇمىستارىن ءبىلىم بەرۋ ساپاسى مەن كادرلار دايارلاۋدى جاقسارتۋ ءۇشىن جۇرگىزەتىنىمىزدى ءتۇسىنۋ ماڭىزدى. بۇل رەتتە ءبىز جوو-لاردى ليسەنزيادان بىردەن ايىرمايمىز جانە ولاردى بىردەن جاپپايمىز. جوعارى وقۋ ورىندارىنا بۇزۋشىلىقتاردى جويۋعا ۋاقىت بەرىلگەنىمەن، ەشقانداي ارەكەت بولعان جوق. وسىعان بايلانىستى ءبىز كەيىنىرەك قاتاڭ شارالار قابىلداۋعا ءماجبۇرمىز.
جوعارى وقۋ ورىندارىنىڭ ستۋدەنتتەرى ءۇشىن جاعداي جاساپ، ءبىلىم بەرۋ باعدارلامالارىنىڭ ساپاسىن جاقسارتۋعا قول جەتكىزۋى ماڭىزدى. ايتپەسە، جوسىقسىز ۋنيۆەرسيتەتتەر ساپالى بىلىممەن قامتاماسىز ەتپەي، ديپلوم بەرۋدى جالعاستىراتىن بولادى.
"اقمەشىت" گۋمانيتارلىق-تەحنيكالىق ينستيتۋتىنا كەلەتىن بولساق، سوڭعى تەكسەرۋ وسى جىلدىڭ ماۋسىم ايىندا جۇرگىزىلدى. بۇزۋشىلىقتار جويىلعان جوق. اڭگىمە ماتەريالدىق-تەحنيكالىق بازانىڭ السىزدىگى جانە وقۋ پروسەسىن ۇيىمداستىرۋداعى ەلەۋلى كەمشىلىكتەر تۋرالى بولىپ وتىر. ۋنيۆەرسيتەتتەگى كەيبىر پاندەردى ءتيىستى ءبىلىمى مەن دارەجەسى جوق وقىتۋشىلار جۇرگىزگەن. ءتىپتى وقۋ پروسەسى مەرزىمىنەن بۇرىن اياقتاپ، ناتيجەسىندە ستۋدەنتتەر ءبىلىم بەرۋ باعدارلامالارىن تولىق يگەرە الماعان. قازىرگى تاڭدا ينستيتۋت وقۋ ورنىن ليسەنزيادان ايىرۋ تۋرالى قابىلداعان شەشىمىمىزگە نارازىلىق بىلدىرۋگە تىرىسىپ جاتىر، – دەدى بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
بۇگىنگى تاڭدا "اقمەشىت" ينستيتۋتىنىڭ ءبىلىم بەرۋ قىزمەتىنە اككرەديتاسياسى جوق. الايدا، ديپلومداردىڭ جارامسىز بولعاندىعىنا قاراماستان، ينستيتۋت ولاردى بعم-دە تىركەلگەن سەريالار مەن نومىرلەرسىز بەرگەن.
سوندىقتان ستۋدەنتتەردىڭ نازارىن جوو ليسەنزيادان ايىرىلعان بولسا جانە جوو اككرەديتتەۋدەن وتپەگەن جاعدايدا، ءبىلىم الۋشىلار گرانتتاردى ساقتاي وتىرىپ ءارى يگەرىلگەن كرەديتتەر مەن پاندەردى قايتا تاپسىرىپ، باسقا جوعارى وقۋ ورىندارىنا اۋىسۋعا قۇقىلى ەكەندىگىنە اۋدارامىز.
وسى جىلدىڭ تۇلەكتەرى باسقا جوعارى وقۋ ورىندارىنا اۋىسا الادى، جانە ولاردىڭ وقۋ ناتيجەلەرى ەسكەرىلىپ، ديپلوم بەرىلەدى.
پىكىر قالدىرۋ