قارجى مينيسترلىگى مەملەكەتتىك كىرىستەر كوميتەتى 30 قىركۇيەككە دەيىن قازاقستان اۋماعىنان قانداي كولىكتەردىڭ شىعارىلۋى كەرەكتىگىن مالىمدەدى.
"شەتەل ازاماتتارى ءوزىنىڭ تۇرعىلىقتى ەلىنە جانە كولىكتى اكەتەتىن ەلگە قايتارۋ ءۇشىن مەملەكەتتىك شەكارادان اتالمىش كولىكتى ءمىنىپ وتە الادى. ەگەر ول مۇمكىن بولماسا، تاسىمالداۋشىلاردىڭ قىزمەتىن پايدالانا الادى" دەلىنگەن حابارلامادا.
بۇل تالاپ ەۋرازيالىق ەكونوميكالىق وداققا مۇشە ەلدەردىڭ مەملەكەتتىك ءنومىرى بار كولىكتەرگە قاتىسى جوق.
– قازاقستان ازاماتتارىنا ەۋرازيالىق ەكونوميكالىق وداق اۋماعىندا بەلارۋس رەسپۋبليكاسى مەن رەسەي فەدەراسياسىنىڭ كولىك قۇرالدارىمەن ۋاقىتشا اكەلۋ مەرزىمدەرىن ەسەپكە الماستان جۇرۋگە بولادى. ال ارمەنيا رەسپۋبليكاسى مەن قىرعىز رەسپۋبليكاسىنىڭ كولىك قۇرالدارىمەن سەنىمحات بويىنشا باسقارۋ قۇقىعىنسىز جۇرە الادى" دەلىنگەن كوميتەت حابارلاماسىندا.
شەتەلدىك كولىك قۇرالدارىن اكەتۋ تۋرالى تالاپ ەۋرازيالىق ەكونوميكالىق وداق ەلدەرىنىڭ بۇكىل اۋماعىنا قولدانىلادى. ياعني، شەتەلدىك كولىك ەۋرازيالىق ەكونوميكالىق وداق اۋماعىنان تىس اۋماققا شىعارىلۋى كەرەك.
وداق اۋماعىنا ءۇشىنشى ەلدەردەن اكەلىنگەن كولىكتى ءتيىستى كەدەندىك راسىمدەۋسىز ءبىر جىل عانا تەبۋعا رۇقسات بەرۋ تۋرالى شەشىمدى ەۋرازيالىق ەكونوميكالىق كەڭەس 2020 جىلعى 29 ساۋىردە شىعارعان بولاتىن.
بۇل كەزدە پاندەميا ءورشىپ، شەكارالاردىڭ ءبارى جابىق تۇرعاندىقتان، مەرزىم 2021 جىلدىڭ 30 قىركۇيەگىنە دەيىن ۇزارتىلعان ەدى. بۇل مەرزىم بىتكەننەن كەيىن اكىمشىلىك پوليسيا كوميتەتى مەن مەملەكەتتىك كىرىستەر كوميتەتىنىڭ قىزمەتكەرلەرى بىرلەسىپ ۋاقىتشا ءجۇرۋ مەرزىمى اياقتالعان كولىكتەردى ىزدەيدى. ونداي كولىكتەر تابىلعان جاعدايدا ايىپ تۇراعىنا قامالادى.
"ەۋرازيالىق ەكونوميكالىق وداقتىڭ قولدانىستاعى زاڭناماسى بويىنشا ۋاقىتشا اكەلۋ مەرزىمدەرى وتكەننەن كەيىن جەكە تۇلعادا كەدەندىك تولەمدەردى تولەۋ مىندەتتەرى تۋىندايدى. تولەمنىڭ مولشەرىن اۋماقتىق مەملەكەتتىك كىرىستەر ورگاندارىنىڭ قىزمەتكەرلەرى ەسەپتەيدى" دەلىنگەن حابارلامادا.
پىكىر قالدىرۋ