بۇگىن «ەكپە ال دا، پاتەر ۇتىپ ال» ناۋقانىنىڭ جەڭىمپازى قايرات قوسايەۆقا ەكى بولمەلى پاتەردىڭ كىلتى تابىستالدى، - دەپ حابارلايدى mangystaumedia.kz سايتى.

سونىمەن قاتار ناۋقانعا قاتىسىپ، باعالى سىيلىقتاردى ۇتىپ العان قاتىسۋشىلارعا سىيلىقتارى بەرىلدى.

«ىندەت كۇشەيىپ بارا جاتقان سوڭ ءوز ەركىممەن ۆاكسينا الدىم. سودان سوڭ وسى ناۋقاننىڭ ۇيىمداستىرىلىپ جاتقانىن ەستىدىم. باعىمدى سىناپ، قاتىسىپ كوردىم. وتكەن جۇمادا كۇتپەگەن جەردەن ۇيىمداستىرۋشى حابارلاسىپ، پاتەر ۇتىپ العانىمدى ايتتى. قوبالجىدىم. قۋاندىم. بۇرىن سوڭدى مۇنداي كونكۋرستارعا سەنبەيتىن ەدىم. ءبىراق وسى ناۋقان شىنايى ەكەن»، - دەيدى قايرات قوسايەۆ.

ونىڭ ايتۋىنشا، ۆاكسينانى تەك ناۋقان ءۇشىن عانا ەمەس، ەڭ ءبىرىنشى دەنساۋلىعى ءۇشىن العان. وسى رەتتە ول تۇرعىندارعا ەكپە الىپ، سول ارقىلى ىندەتتىڭ الدىن الۋ كەرەك ەكەنىن ايتتى.

پاتەر كىلتىن تابىستاۋ شاراسى وتكەننەن سوڭ ۇيىمداستىرۋشىلار مەن جەڭىمپاز 38 شاعىناۋداندا سالىنىپ جاتقان تۇرعىن ۇيگە بارىپ، پاتەردىڭ قۇرىلىس جۇمىستارىمەن تانىستى.

ەسكە سالا كەتەيىك، ناۋقان ءبىر جارىم ايعا دەيىن سوزىلدى. 40-قا جۋىق ادام باعالى سىيلىقتاردىڭ يەسى اتاندى.