ءبىلىم جانە عىلىم ءمينيسترى اسحات ايماعامبەتوۆ ءالىپپە وقۋلىعى 1 قىركۇيەكتەن باستاپ قولدانىسقا ەنەتىنىن حابارلادى. بۇل تۋرالى ول مينيسترلىكتىڭ اپپارات جينالىسىندا ايتتى.
– وسى سالتاناتتى شارادا (1 قىركۇيەكتە-رەد) العاش مەكتەپ تابالدىرىعىن اتتاپ جاتقان 1-سىنىپ وقۋشىلارىنا الىپپەنى ۇستاتۋىمىز كەرەك. بۇل – وتە جاقسى ءداستۇر. الىپپە – بالانىڭ ەڭ العاشقى وقۋلىعى. سوندىقتان بىلتىر ايتقانداي، الىپپەنى دايىندادىق. جالپى الىپپە دايىن. وڭىرلەرگە جەتكىزىلىپ جاتىر، – دەدى مينيستر.
ايماعامبەتوۆ "الىپپە" مەن "بۋكۆار" دايىندالىپ، انا ءتىلى بويىنشا دا دايىندىق جۇمىستارى جۇرگىزىلگەنىن اتاپ ءوتتى.– الىپپە بويىنشا ادىسكەرلەر مەن عالىمدار اۋقىمدى جۇمىس اتقاردى. ۇلت ۇستازى احمەت بايتۇرسىنوۆتىڭ 1912 جىلعى الىپپەسىندەگى باستى قاعيدات نەگىزىندە وقۋلىقتى ازىرلەدىك. بۇل ادىستەمە بويىنشا كوپ ماسەلە كوتەرىلدى. ونىڭ نەگىزگى ۇستانىمىنداعى دىبىسپەن جاتتىعۋ، ءاربىر دىبىستىڭ ءسوز جاساۋداعى قىزمەتىن ەسكە الۋ، بۋىن بويىنشا وقۋ، وڭايدان قيىنعا، جەڭىلدەن كۇردەلىگە ءوتۋ قاعيداسىن ساقتادىق، – دەدى ءبىلىم ءمينيسترى.
مينيستر اتاعانداي، الىپپەدە بارلىق وقۋ ماقساتى ساقتالدى. سوندىقتان ادىستەمەلىك جاعىنان بالانىڭ جاس ەرەكشەلىگىنە سايكەس جۇمىستار جۇرگىزىلىپ جاتىر.
– بالالار الىپپەنى I-II توقساندا وقىسا، انا ءتىلىن III توقساننان باستاپ وقيدى. وسى جۇمىستى بارلىق وڭىرلەر ءتيىستى دەڭگەيدە جۇزەگە اسىرادى، – دەپ ءسوزىن تۇيىندەدى اسحات ايماعامبەتوۆ.
پىكىر قالدىرۋ