گەرمانيانىڭ قوعامدىق دەنساۋلىق ساقتاۋ ورگانى روبەرت كوح ينستيتۋتى ۆاكسينالاردىڭ ۆيرۋسقا قارسى تيىمدىلىگى جوعارى ەكەنىن انىقتادى. نەمىس ساياساتكەرلەرى ەلدە ۆاكسينالاۋدى كۇشەيتۋدىڭ ەڭ جاقسى ءادىسىن تالقىلاپ جاتىر.

گەرمانيانىڭ قوعامدىق دەنساۋلىق ساقتاۋ ورگانى روبەرت كوح ينستيتۋتى شىعارعان جاڭا زەرتتەۋلەرگە سايكەس، گەرمانيادا كوروناۆيرۋسقا قارسى جاپپاي ۆاكسينالاۋ ناۋقانى مىڭداعان ادامداردىڭ ءومىرىن قۇتقارىپ قالدى.

باياندامادا نە ايتىلدى؟

زەرتتەۋ ينستيتۋتى جاريالاعان ەسەپتە ۆيرۋستىڭ "ءۇشىنشى تولقىنى" كەزىندەگى ۆاكسينالاۋ 38 000 ءولىمنىڭ الدىن العانى كورسەتىلگەن. سونىمەن قاتار، ۆاكسينا ارقىلى 706،000-نان استام ادام ينفەكسيادان قورعالعان.

ەسەپتەلگەن مودەل گەرمانيانىڭ جاپپاي ۆاكسينالاۋ ناۋقانىنىڭ سوڭعى 6،5 ايىنداعى مالىمەتتەرگە نەگىزدەلگەن.

اقپاراتقا سايكەس، ۆاكسينالاۋ 76،000-نان استام ادامنىڭ اۋرۋحاناعا جاتقىزىلۋىنىڭ الدىن العان جانە 20،000-عا جۋىق ادام رەانيماسيا بولىمىنە تۇسۋدەن امان قالعان.

نەمىس زەرتتەۋ ينستيتۋتى ۆاكسينانىڭ ۆيرۋسقا قارسى تيىمدىلىگى جوعارى ەكەنىن انىقتادى. دەنساۋلىق ساقتاۋ ۇيىمىنىڭ مالىمەتتەرى بويىنشا، ۆاكسينا "پاندەميادان شىعۋعا جول اشادى".

گەرمانيادا 45 ميلليون ادام تولىق ۆاكسينالاندى

نەمىس بيلىگى قازىرگى ۋاقىتتا ەلدە ۆاكسينالاۋدى جاقسارتۋدىڭ ەڭ جاقسى جولىن تالقىلاپ جاتىر.

دەنساۋلىق ساقتاۋ ءمينيسترى يەنس شپان گەرمانيادا 45 ميلليوننان استام ادام ياعني حالىقتىڭ 54،5%-ى تولىق ۆاكسينالانعانىن مالىمدەدى.

گەرمانيادا جالپى 51،8 ميلليون ادام نەمەسە 62،3% حالىق ۆاكسينانىڭ كەم دەگەندە ءبىر دوزاسىن الدى.

شپان جاقىندا 12 جاستان 17 جاسقا دەيىنگى بالالارعا ۆاكسينا ەگۋدى ۇسىندى، ءبىراق بۇل يدەيانى نەمىس ۇلتتىق رەتتەۋشىلەرى ءالى ماقۇلداعان جوق.

"ۆاكسينا الۋ - بۇل جەكە شەشىم، ءبىراق سونىمەن بىرگە بارىمىزگە دە اسەر ەتەدى" دەپ جازدى شپان  تۆيتتەردە.

ۆاكسينالاۋ ساياساتىنا قاتىستى قايشىلىقتار

فرانسيا جانە يتاليا سياقتى ەۋروپالىق ەلدەردە قوعامدىق ورىندارعا كىرۋ ءۇشىن تۇرعىنداردان ۆاكسينالانعانىن نەمەسە COVID-19-دان ەمدەلگەنىن راستاۋدى تالاپ ەتەدى.

بۇل ەلدەردىڭ شەشىمى جاپپاي نارازىلىققا ۇشىرادى. كەيبىر ازاماتتار بۇل ساياسات ولاردىڭ بوستاندىقتارىنا نۇقسان كەلتىرەدى دەپ سانايدى.

گەرمانيادا "Querdenker" قوزعالىسىنىڭ قولداۋشىلارى كوروناۆيرۋستىق شەكتەۋلەر مەن ۆاكسينالارعا قارسى كوشەگە شىقتى.

كەيبىر نەمىس ساياساتكەرلەرى ۆاكسينانى مىندەتتى ەتۋگە قارسى بولدى.

گەرمانيا بۋندەستاگىنداعى ەركىن دەموكراتيالىق پارتياسىنىڭ مۇشەسى ەندريۋ ۋللمان "Deutschlandfunk" اگەنتتىگىنە بەرگەن سۇحباتىندا ۆاكسينانى قولدايتىنىنا قاراماستان، ماجبۇرلەۋدى ءتيىمدى ساياسات دەپ سانامايتىنىن ايتتى.