قىتايدىڭ كەيبىر باي ونەركاسىپ الپاۋىتتارى بەيجىڭنىڭ رەتتەۋ شارالارى كەزىندە 100 ملد دوللارعا جۋىق جەكە بايلىقتارىن جوعالتتى.
Finanical Times اقپاراتىنشا، بەيجىڭ قىتايلىق ديدي چۋكسينگە قارسى ساياساتتى باستاعاننان بەرى، ديدي چۋكسيننىڭ جالپى كىرىسى 16%-عا تومەندەگەن.
مالىمەتكە سايكەس، ەڭ اۋىر سوققىلاردىڭ ءبىرى پيندۋودۋ ەلەكتروندى كوممەرسيا سايتىنىڭ نەگىزىن قالاۋشى كولين حۋانگە جاسالعان. ول بايلىعىنىڭ ۇشتەن بىرىنەن نەمەسە 15،6 ميلليارد دوللارىنان ايىرىلعان. پيندۋودۋ اكسيالارى شىلدە ايىنىڭ باسىنان بەرى 27% شاماسىندا قۇنسىزداندى.
Alibaba-نىڭ نەگىزىن قالاۋشى دجەك ما سوڭعى كەزدەرى اۋىر شىعىنداردان امان قالدى، ءبىراق ول دا بەيجىڭنىڭ قاتال ساياساتىنان از زارداپ شەكپەدى. شىلدەنىڭ باسىنان بەرى دجەك ما 2،6 ميلليارد دوللار جوعالتقان، ال، قاراشادان بەرى 13 ميلليارد دوللاردان ايىرىلعان.
دەسە دە، كەيبىر قىتايلىق ماگناتتار نورماتيۆتىك شابۋىلدان پايدا كوردى.
"Nongfu Spring" كومپانياسىنىڭ يەسى چجۋن شانشان 72 ميلليارد دوللار بايلىعىمەن قىتايدىڭ ەڭ باي ادامى اتاندى. ونىڭ داۋلەتى ماۋسىمنىڭ سوڭىنان بەرى 5 ميلليارد دوللارعا ءوستى. سول سياقتى، قىتايدىڭ اۆتوكولىك جانە جاڭارتىلاتىن ەنەرگيا سالاسىنداعى جەتەكشى ونەركاسىپشىلەرىنىڭ بايلىعى سوڭعى ەكى ايدا كوبەيدى.
ەڭ ۇلكەن شىعىن تەحنولوگيالىق سالاداعى قىتايلىق ميللياردەرلەردە بولدى. سونىمەن قاتار، جىلجىمايتىن مۇلىك پەن دەنساۋلىق ساقتاۋ سياقتى باسقا دا سالالارداعى كەيبىر ميللياردەرلەر دە زارداپ شەكتى.
Finanical Times باسىلىمى بەيجىڭنىڭ سوڭعى كەزدەگى قاتال ساياساتى سالدارىنان قىتايلىق بايلار 87 ملد دوللار شاماسىندا جوعالتقانىن ەسەپتەسە، وزگە اقپارات كوزدەرى قىتايلىق ميللياردەرلەردىڭ ودان دا كوپ شىعىنعا باتقانىن ايتادى.
پىكىر قالدىرۋ