الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى زەينەتكەرلەردىڭ "Ashyq" قوسىمشاسىن پايدالانۋىنا قاتىستى مالىمدەمە جاسادى.
بۇقارالىق اقپارات قۇرالدارىندا زەينەتكەرلەر دە "Ashyq" قوسىمشاسىنىڭ بولماۋىنا بايلانىستى ازىق-تۇلىك دۇكەندەرىنە كىرۋىنە شەكتەۋ قويىلاتىنى ايتىلعان بولاتىن.
الايدا دەپارتامەنت سمارتفونى مەن "Ashyq" قوسىمشاسى جوق قارت ادامدار جەكە كۋالىكپەن ازىق-تۇلىك دۇكەندەرى مەن ءدارىحانالارعا كىرە الاتىنىن حابارلادى.
"ءسىز سمارتفونداعى ءموبيلدى قوسىمشا ارقىلى Ashyq جوباسىندا جۇمىس ىستەيتىن نىساندارعا كىرە الاسىز، ول بولماعان جاعدايدا، جەكە كۋالىك ارقىلى كەلۋشىنىڭ مارتەبەسىن سكانەرلەيدى. جەكە كۋالىكتىڭ كومەگىمەن قارت ادامدار "Ashyq" نىساندارىنا، سونىڭ ىشىندە ازىق-تۇلىك دۇكەندەرىنە، ءدارىحانالارعا جانە باسقا جەرلەرگە بارا الادى" دەلىنگەن حابارلامادا.
پىكىر قالدىرۋ