اقش–تىڭ بۇرىنعى پرەزيدەنتى دونالد ترامپ تالىپتەر اۋعانستان استاناسى كابۋلدى باسىپ العاننان كەيىن پرەزيدەنت دجو بايدەننىڭ وتستاۆكاعا كەتۋىن تالاپ ەتتى. بۇل تۋرالى Anadolu Ajans اگەنتتىگى حابارلادى.

"دجو بايدەن اۋعانستاندا بولعان جاعدايعا جول بەرگەنى ءۇشىن ۇيالىپ وتستاۆكاعا كەتەتىن ۋاقىتى كەلدى" دەپ جازىلعان ترامپ مالىمدەمەسىندە.

ترامپ سونىمەن قاتار اقش پرەزيدەنتىن ەلدەگى COVID-19 جاعدايىنىڭ كوبەيگەنى، ىشكى ميگراسيا، ەكونوميكا مەن ەنەرگەتيكا ءۇشىن سىنعا الدى.

– دجو بايدەننىڭ اۋعانستانعا جاساعانى امەريكا تاريحىنداعى ەڭ ۇلكەن جەڭىلىستىڭ ءبىرى رەتىندە تاريحتا قالادى، – دەدى ول.

اۋعانستاندا نە بولدى؟

اقش پەن تالىپتەر 2020 جىلدىڭ اقپانىندا حالىقارالىق كۇشتەردى اۋعانستاننان شىعارۋ تۋرالى بەيبىت كەلىسىمگە كەلگەن. پروسەسس وسى جىلى باستالدى.

كەلىسىم شەتەلدىك كۇشتەرگە شابۋىل جاساماۋدى كوزدەگەنىمەن، تالىپتەردىڭ اۋعانستان قاۋىپسىزدىك كۇشتەرىنە قارسى ارەكەتىنە قاتىستى ەشقانداي ەرەجە قاراستىرىلماعان.

تالىپتەر دوحاداعى اۋعانستان ۇكىمەتىمەن كەلىسسوزدەردى جالعاستىرا وتىرىپ، ماۋسىمنان بەرى اۋعانستاننىڭ كوپتەگەن اۋداندارى مەن پروۆينسيالارىنىڭ ورتالىقتارىن باسىپ الدى.

ەل استاناسى  كابۋلدى قورشاپ العان تالىپتەر ۇكىمەتكە اكىمشىلىك استانانى بەيبىت جولمەن بەرۋگە شاقىرعان.

تالىپتەر كابۋلدى باسىپ العاننان كەيىن پرەزيدەنت اشراف عاني 15 تامىزدا اۋعانستاننان قاشىپ كەتكەن.

"تالىپتەر" قوزعالىسىنىڭ وكىلى زابيحۋللا مۋدجاحيد ۇكىمەت كۇشتەرى كابۋلدان كەتىپ بارا جاتقاندا قالا مەن قوعامدىق عيماراتتاردى باقىلاۋعا الا باستاعانىن ايتتى.

كابۋلداعى پرەزيدەنتتىك سارايدا جاسالعان مالىمدەمەدە تالىپتەر ەل استاناسى مەن اۋعانستاندا ۇستەمدىك ورناتاتىنىن مالىمدەدى.

"اقش اۋعانستانعا 5 مىڭ اسكەر جىبەردى"

تالىپتەر كابۋلدى باسىپ العاننان كەيىن اقش پرەزيدەنتى دجو بايدەن اۋعانستانعا قوسىمشا 5 مىڭ اسكەر جىبەردى. ول اسكەرلەر اۋعانداردى ەۆاكۋاسيالاۋعا كومەكتەسەدى.

وسىلايشا دجو بايدەن كابۋلداعى جاعداي "وتە اۋىر" ەكەنىن ايتتى.