اقش پرەزيدەنتى دجو بايدەن تەلەديداردان ۇندەۋ جولداپ، اقش اسكەرلەرى قاشانعا دەيىن اۋعانستاندا بولاتىنىن ايتتى.
تاليبان قارۋلى كۇشتەرى اۋعانستان استاناسى كابۋلعا جەتىپ، اۋەجايدا بەيبەرەكەت بولعاننان كەيىن اقش پرەزيدەنتى دجو بايدەن اق ۇيدەن ۇندەۋ جاسادى.
"اقش اسكەرلەرى امەريكالىقتار مەن وداقتاس اۋعاندىقتاردى ەۆاكۋاسيالانعانشا كابۋلدا بولادى" دەدى بايدەن.
تالىپتەر 20 جىلدىق سوعىستان كەيىن جەڭىسىن جاريالاپ، استانانى باقىلاۋعا العان كەزدە، ونداعان مىڭ اۋعاندىق باتىس ەلدەرىنە قاشۋعا ءماجبۇر بولدى. باتىس ەلدەرى ولاردى الىپ كەتۋگە ۋادە بەرگەن، الايدا ولار ءقازىر اۋعانستاندا قالىپ قويدى.
اقپاراتتار بويىنشا، تاليبان باتىس ءۇشىن ىستەگەن ادامداردىڭ ءتىزىمىن جاساپ، ۇيلەردى ارالاپ، ولاردى ءولتىرىپ جاتىر.
بايدەن تاليبان جىلدام جەڭىسكە جەتەتىنىن كۇتپەگەنىن مويىندادى جانە ونى اشراف گاني بيلىكتەن كەتكەن سوڭ ۇكىمەت باسشىلىعىنىڭ جوقتىعىمەن، اۋعانستان قارۋلى كۇشتەرىنىڭ سوعىسۋعا ىقىلاسى جوق ەكەنىمەن ءتۇسىندىردى.
– ءبىز ولارعا ءوز بولاشاعىن انىقتاۋعا بارلىق مۇمكىندىك بەردىك. ءبىز ولارعا بەرە المايتىن نارسە بار، ول بولاشاق ءۇشىن كۇرەسۋگە دەگەن ەرىك، – دەيدى بايدەن.
پىكىر قالدىرۋ