شىمكەنت قالاسىندا جىل باسىنان بەرى 2000-عا جۋىق جاستار «ەڭبەك» مەملەكەتتىك باعدارلاماسىنىڭ شەڭبەرىندە 6 اي مەرزىمىندە «جاستار پراكتيكاسى» باعىتىندا تاجىريبە جيناقتادى.

تاجىريبە جيناپ، ءارى جۇمىس ورنىندا جاقسى ناتيجە كورسەتىپ، تۇراقتى جۇمىسقا ورنالاسقان جاستاردىڭ ءبىرى –ايدانا يسابەكوۆا. ول 2019 جىلى «ازيمەد» كوللەدجىندە «مەدبيكە» ماماندىعى بويىنشا ءبىلىم الدى. وقۋ بىتىرگەن سوڭ، ءوز ماماندىعى بويىنشا جۇمىس تابا الماي، اعىمداعى جىلدىڭ باسىندا قالالىق حالىقتى جۇمىسپەن قامتۋ ورتالىعىندا جۇمىسسىز رەتىندە تىركەلدى. كەيىنەن ورتالىق ماماندارى جۇمىس ىزدەۋشى جاسقا جۇمىس تابۋدىڭ ءتيىمدى جولىن تاۋىپ، «جاستار پراكتيكاسىنا» قاتىسۋدى ۇسىندى، - دەدى ايدانا يسابەكوۆا، شىمكەنت قالاسىنىڭ تۇرعىنى

مەديسينا ماماندىعى بويىنشا جۇمىس جاساپ، كوپشىلىككە كومەگىم ءتيىپ، بىلىكتى مامان بولعىم كەلەدى. وسى كلينيكالىق ەمحانادا الدىمەن جاستار باعدارلاماسىمەن تاجىريبە جيناپ، سودان سوڭ ماعان بۇل جەرگە تۇراقتى جۇمىسقا قالۋدى ۇسىندى. قۋانا بۇل ۇسىنىستى قابىلداپ، الداعى ۋاقىتتا جاقسى كورسەتكىشتەردى كورسەتەمىن.

اعىمداعى جىلدىڭ 3 تامىزىنان باستاپ ايدانا يسابەكوۆا قالاداعى №1 كلينيكالىق ەمحاناسىندا «مەدبيكە» قىزمەتكەرى رەتىندە تۇراقتى جۇمىسقا ورنالاستى.
جاستار پراكتيكاسى – بۇل ماماندىق بويىنشا العاشقى جۇمىس تاجىريبەسىن الۋ ماقساتىمەن جۇرگىزىلەتىن وقۋ ورىندارىنىڭ تۇلەكتەرىن ۋاقىتشا جۇمىسقا ورنالاستىرۋ. جالاقىسى 25 ايلىق ەسەپتىك كورسەتكىشتى قۇرايدى.

ايتا كەتەيىك، اتالعان باعدارلامانىڭ تالاپتارى بويىنشا قاتىسۋشىنىڭ جاسى 29-دان اسپاۋى ءتيىس، «جۇمىسسىز» مارتەبەسى بولۋى قاجەت جانە سوڭعى ءۇش جىل ىشىندە جوعارعى وقۋ ورىندارى مەن كوللەدجەردىڭ تۇلەكتەرى ءبىر-اق رەت قاتىسا الادى.

ايتا كەتۋ كەرەك، بيىل «جاستار پراكتيكاسى» باعدارلاماسى بويىنشا 2500 جاستى ۋاقىتشا جۇمىسقا ورنالاستىرۋ جوسپارلانسا، بۇگىندە 2000-عا جۋىعى قالاداعى ءتۇرلى مەكەمەلەر مەن كاسىپورىندارعا جولداندى. ال، جىل باسىنان بەرى 6 اي مەرزىمىندە تاجىريبە جيناقتاعانداردىڭ ىشىنەن 15-كە جۋىعى تۇراقتى جۇمىسقا ورنالاستى.