شىمكەنتتە ۆيرۋسقا قارسى ەكپە سالدىرۋشىلار قاتارى ارتىپ كەلەدى. ءبىر عانا №9 ەمحاناسىندا وسى ۋاقىتقا دەيىن 40.132 ادام ۆاكسينالانعان. مەديسينالىق مەكەمەدە ەكپەنىڭ 3 ءتۇرى سالىنۋدا. اق حالاتتىلار ءدۇيىم جۇرتتىڭ دەگبىرىن قاشىرعان سىرقاتتى اۋىزدىقتاۋ ەكپە ەگۋ ارقىلى تىيىلار ەدى، دەيدى. سول سەبەپتى، بارلىق قالا تۇرعىندارىنا ۆاكسينا سالۋعا كەڭەس بەرەدى.

ەمحانالارداعى ەكپە ەگۋ كابينەتتەرىنىڭ بارلىعى قاجەتتى جابدىقتارمەن قامتاماسىز ەتىلگەن. ەكپە سالاتىن قىزمەتكەرلەر ارنايى وقىتۋدان وتكەن. ۆاكسيناسيا تۇرعىلىقتى جەرى بويىنشا ەمحانادا جۇرگىزىلەدى. ەكپە سالاردان الدىن ازامات مىندەتتى تۇردە ساۋالناماعا جاۋاپ بەرىپ، ەرىكتى تۇردە ۆاكسينا الاتىنا تۋرالى كەلىسىم بەرەدى. №9 قالالىق ەمحانادا ءبىرىنشى كومپونەنت 22.370 ازاماتقا، ال ەكىنشى كومپونەنت 17.305 ازاماتقا سالىندى. حالىقتىڭ ۆاكسيناعا دەگەن ىقىلاسى جاقسى دەيدى،- راۋشان ورازبايەۆا.

- قازىرگى ۋاقىتتا №9 قالالىق ەمحاناعا 68320 ادام تىركەلگەن. ۆاكسينانى 75% ياعني 29670 ادام الۋى ءتيىس. ءقازىر ءبىرىنشى كومپونەنتتى 22370 ادام، ەكىنشى كومپونەنتتى 17305 ادام الدى. بۇل ءبىزدىڭ ەمحاناعا بايلانعان حالىقتىڭ 75% - ىن قۇرايدى. ءقازىر ءبىز سپۋتنيك V مەن وتاندىق QazVac ۆاكسينالارىن قويامىز.

ۆاكسيناسيا العاندارعا مەديسينالىق باقىلاۋ تالاپقا سايكەس ۇيىمداستىرىلىپ، جۇيەلى جۇرگىزىلۋدە. بۇگىنگى كۇنى كوروناۆيرۋس ينفەكسياسىنا قارسى ەكپە ەگىلگەن ازاماتتاردىڭ دەنساۋلىعى قاناعاتتانارلىق. شىمكەنت قالاسىنىڭ تۇرعىنى اينۇر نۇرجانوۆا ەكپەنىڭ ەكىنشى كومپونەنتىن سالدىرۋعا كەلدى. ول ۆاكسينا ءقاۋىپتى ىندەتتى جۇقتىرىپ الماۋدىڭ جالعىز جولى دەپ بىلەدى.

بۇكىل الەمدەگى قيىن جاعدايدى بارلىعى كورىپ وتىر. مەن ۆاكسينانىڭ ەكى كومپونەنتىن ءوز دەنساۋلىعىم ءۇشىن جانە جانىمداعى ادامداردى ينفەكسيادان قۇتقارۋ ءۇشىن الدىم. مەندە ەشقانداي جاناما اسەرلەر بولعان جوق.

ايتا كەتەيىك، ەمحانالاردا ءقازىر ەكپەنىڭ 3 ءتۇرى قولدانىستا. ولار وتاندىق QazVac، سپۋتنيك V جانە Hayat-Vax. قاي ەكپەنى قابىلداۋدى پاسيەنتتىڭ ءوزى شەشەدى. دارىگەرلەر جۇمىس كۇنى تاڭەرتەڭگى 8-دەن، ال دەمالىس كۇندەرى 9-دان 20:00-گە دەيىن قىزمەت كورسەتەدى.