شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى تاراپىنان الەۋمەتتىك قولداۋ كورسەتۋ ساناتىنداعى ازاماتتارعا شيپاجايلارعا تەگىن جانە جەڭىلدىكپەن جولدامالار بەرىلەدى.  

بيىل جولداما سانىنا بولىنگەن 6174 ازاماتتىڭ ىشىنەن 2000-نان استامى شىمكەنت قالاسىنىڭ «دەنساۋلىق» شيپاجايىنا، تۇلكىباس اۋدانىنىڭ «اقسۋ-جاباعىلى» جانە تاراز قالاسىنىڭ «ايشا ءبيبى» شيپاجايلارىنا جىبەرىلۋدە.

ساناتوريالىق-كۋرورتتىق ەمدەۋ ۇلى وتان سوعىسىنىڭ قاتىسۋشىلارىنا جانە ولارعا تەڭەستىرىلگەن تۇلعالارعا، زەينەتكەرلىك جاستاعى «التىن القا»، «كۇمىس القا» يەگەرلەرىنە 12 كۇنگە تەگىن بەرىلەدى. ال، زەينەتكەرلەرگە جولداما قۇنىنىڭ 50 پايىزىن تولەۋمەن، ياعني 6 كۇنگە بەرىلەدى.

بۇگىنگى كۇنى قالادا 82 821 زەينەتكەر تىركەلگەن، ونىڭ ىشىندە ۇوس ارداگەرلەرى – 20، تىل ارداگەرلەرى – 3 153. سونداي-اق، «التىن القا» جانە «كۇمىس القا» يەگەرى اتانعان 2377 زەينەتكەر بار.

شيپاجايلارعا جولداما بەرىلۋ جۇمىستارى مەملەكەتتىك تاپسىرىس شەڭبەرىندە جۇزەگە اسىرىلادى. جولداما الۋ ءۇشىن بايتەرەكوۆ كوشەسى، 89 مەكەنجايى بويىنشا قالالىق جۇمىسپەن قامتۋ جانە الەۋمەتتىك قورعاۋ باسقارماسىنا ءوتىنىش قالدىرۋ قاجەت. جولداما كەزەك بويىنشا بەرىلەدى. كەزەككە تۇرۋ ءۇشىن جەكە كۋالىك جانە 068 نىسانىنداعى دارىگەرلىك انىقتاما قاجەت.