سىرتقى ىستەر مينيسترلىگى قازاقستان اۋعانستانداعى جاعدايدىڭ دامۋ بارىسىن مۇقيات قاداعالاپ وتىرعانن حابارلادى.
"اتالعان ەلدىڭ تاريحىندا تاعى ءبىر شەشۋشى ءسات كەلە جاتىر. كوپجىلدىق جانجالدى اۋعان حالقى ءوزى شەشۋى كەرەك. قازاقستان بارلىق تاراپتاردى ىشكى تۇراقتاندىرۋدىڭ باستى العىشارتى رەتىندە بيلىكتىڭ بەيبىت ءترانزيتىن قامتاماسىز ەتۋگە شاقىرادى. ءبىز بۇۇ قاۋىپسىزدىك كەڭەسىنىڭ ينكليۋزيۆتى جانە وكىلدىك ۇكىمەت قۇرۋ، ۇلتتىق ازشىلىقتار مەن ايەلدەردىڭ قۇقىقتارىن قۇرمەتتەۋ، باسقا مەملەكەتتەرگە ءقاۋىپ توندىرەتىن توپتاردىڭ بولۋىنا جول بەرمەۋ، حالىقارالىق قۇقىقتى ساقتاۋ تۋرالى مالىمدەمەسىن قولدايمىز. وسى ەرەجەلەردى ورىنداۋ اۋعانستاننىڭ جاڭا بيلىگىمەن ديالوگتى باستاۋ ءۇشىن قاجەتتى شارت بولۋى ءتيىس" دەلىنگەن مينيسترلىك حابارلاماسىندا.
تاليبان قوزعالىسى اۋعانستانداعى بيلىكتى قولعا العاننان كەيىن ەلدە بەيبەرەكەت باستالدى. ازاماتتاردىڭ ءبىرازى ەلدەن كەتۋگە تىرىسسا، ەلدە قالعاندار ۇرەيمەن كۇنەلتىپ ءجۇر. اسىرەسە، ايەلدەر قۇقىعىنا بايلانىستى الاڭداۋشىلىق باسىم. اۋعانستانداعى ايەلدەر مەن ايەلدەر قۇقىعى جونىندەگى ساراپشىلار ءتالىپ بيلىگى قىز-كەلىنشەكتەرگە پاراندجا كيگىزىپ، ءبىلىم الۋعا، جۇمىس ىستەۋگە شەكتەۋ قويۋى مۇمكىن دەپ قاۋىپتەنەدى.
پىكىر قالدىرۋ