جۋرناليست، قازاق كسر-ىنىڭ ەڭبەك سىڭىرگەن مادەنيەت قايراتكەرى سۇلتان ورازالين 80 جاسىندا دۇنيەدەن ءوتتى.

سۇلتان ورازالين 1941 جىلى 30 ساۋىردە شىعىس قازاقستان وبلىسى اياگوز قالاسىندا تۋعان.

1964 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن بىتىرگەن. ەڭبەك جولىن سەمەي وبلىسى، اباي اۋداندىق "سوسياليستىك مال شارۋاشىلىعى" گازەتىندە ادەبي قىزمەتكەر بولىپ باستاعان.

كەيىن اياگوز اۋداندىق كومسومول كوميتەتىندە، قازاق راديوسى مەن تەليەۆيدەنيەسىندە رەداكتور، اعا رەداكتور، كۇندەلىكتى حابارلار باعدارلاماسىنىڭ باس رەداكتورى بولىپ ىستەگەن.

سۇلتان ورازالين “سۇحبات”، “حالىق قازىناسى”، “شۇعىلا”، “قىمىزحانا”، “كەزدەسۋ”، “ايتىس” حابارلارىن العاش ۇيىمداستىرىپ، سەنارييلەرىن جازىپ، ەفيردە جۇرگىزگەن.

300-گە جۋىق ادەبي سەناريي مەن 40 شاقتى عىلىمي-زەرتتەۋ ماقالا اۆتورى.