ۇلتتىق بانك ءتوراعاسى ەربولات دوسايەۆ ينفلياسيانى تومەندەتۋ جوسپارىن جاريالادى.

– 2021 جىلى جەتى ايدىڭ ىشىندە قازاقستان ەكونوميكاسى 2،7 پايىزعا ءوستى. ال جىل قورىتىندىسى بويىنشا ىشكى جالپى ءونىم 3،7 پايىزعا ارتىپ، داعدارىسقا دەيىنگى دەڭگەيگە جەتەدى دەپ كۇتىپ وتىرمىز،– دەدى دوسايەۆ ۇكىمەت وتىرىسىندا.

باس بانكيردىڭ سوزىنشە، الداعى ۋاقىتتا ينفلياسيانىڭ دەڭگەيى دە تومەندەيدى.

– پرەزيدەنتتىڭ تاپسىرماسىنا ساي، ينفلياسيانى 2022 جىلى 4-6 پايىزعا، 2022-2024 جىلدارى 4-5 پايىزعا، ال 2025-2026 جىلدارى 3-4 پايىزعا تومەندەتۋگە بولادى، – دەدى ول.

بۇعان دەيىن قازاقستان ەۋرازيالىق ەكونوميكالىق وداق ەلدەرى اراسىندا ازىق-تۇلىك قىمباتتاپ جاتقان جالعىز ەل بولىپ وتىرعانى حابارلانعان.

ەاەو بويىنشا ازىق-تۇلىك تاۋارلارى مەن قىزمەتتەرىنىڭ باعا يندەكسى 2021 جىلعى شىلدەدە 2021 جىلعى ماۋسىممەن سالىستىرعاندا 100،3 پايىزدى كورسەتكەن.

وسى رەتتە ازىق-تۇلىك تاۋارلارىنىڭ باعاسى قازاقستاننان وزگە ەاەو ەلدەرىنىڭ بارلىعىندا تومەندەگەن.

2020 جىلعى جەلتوقسانمەن سالىستىرعاندا ەاەو بويىنشا جالپى ءوسىم 4،7 پايىزدى قۇراعان. قىمباتشىلىقتىڭ تومەنگى دەڭگەيى ارمەنيا (3،3%) مەن رەسەيدە (4،5% ) تىركەلگەن.

قازاقستاندا شىلدە ايىندا قىمباتشىلىق 11 پايىزى كورسەتكەن. سوڭعى ايدا ەت پەن سۇيىق ماي جانە قانت باعاسى قىمباتتاعان.