تاليبان قوزعالىسىنىڭ وكىلى حالىقارالىق كۇشتەردىڭ ەۆاكۋاسيا مەرزىمىن ۇزارتۋعا كەلىسپەيتىنىن ايتتى. الايدا اقش پرەزيدەنتى دجو بايدەن ەۆاكۋاسيا مەرزىمىن ۇزارتاتىن شەشىم شىعارادى دەپ كۇتىلۋدە.

سەيسەنبىدە وتەتىن G7 سامميتىندە ۇلىبريتانيا پرەمەر-مينيسترى بوريس دجونسون اقش اسكەرلەرىنىڭ اۋعانستاندا قالۋ مەرزىمىن ۇزارتۋدى سۇرايتىنىن ايتتى.

ۇلىبريتانيانىڭ قارۋلى كۇشتەر ءمينيسترى دجەيمس حيپپي "بۇل G7 باسشىلارى اراسىندا بولاتىن تالقىلاۋ ەمەس، بۇل تاليبانمەن بولاتىن تالقىلاۋ" دەدى كەزدەسۋ جايلى.

فرانسيا دا ەۆاكۋاسيانى اياقتاۋ ءۇشىن كوبىرەك ۋاقىت قاجەت ەكەنىن ايتىپ، مەرزىم تاياعان سايىن پ الاڭداۋشىلىق بىلدىرۋدە.

گەرمانيا سىرتقى ىستەر ءمينيسترى حەيكو مااس ناتو وداقتاستارىمەن جانە تاليبانمەن كابۋل اۋەجايىندا بەلگىلەنگەن مەرزىمنەن كەيىن دە اشىق ۇستاۋدى تالقىلاپ جاتقانىن ايتتى.

سەنبىدە ەۋروپالىق وداقتىڭ سىرتقى ساياسات جونىندەگى باسشىسى حوسەپ بوررەلل ون مىڭداعان اۋعان قىزمەتكەرى مەن ولاردىڭ وتباسىن بەلگىلەنگەن مەرزىمگە دەيىن ەۆاكۋاسيالاۋ "ماتەماتيكالىق تۇرعىدان" مۇمكىن ەمەستىگىن ايتتى.

G7 باسشىلارى كەزدەسكەن كەزدە اقش پرەزيدەنتى دجو بايدەن اۋعانستانداعى ەۆاكۋاسيانى ۇزارتۋ تۋرالى شەشىم قابىلدايدى دەپ كۇتىلۋدە.

اقپاراتتارعا قاراعاندا، دجو بايدەن سەيسەنبىدە ەۆاكۋاسيانى 31 تامىزدان كەيىن جالعاستىرۋ تۋرالى شەشىم قابىلدايدى. بۇنداي بولجام تۋرالى ءال-جازيرا جانە گەرمانيانىڭ DW باسىلىمى جازدى. اقش پالاتاسى بارلاۋ كوميسسياسىنىڭ ءتوراعاسى ەۆاكۋاسيا پروسەسسىنىڭ 31 تامىزدان بۇرىن  اياقتالۋى "ەكىتالاي" ەكەنىن ايتتى.

بايدەن كابۋل اۋەجايىنداعى قايعىلى كورىنىستەردى راستاپ، ەۆاكۋاسيا كەزىندە ادام شىعىنى، "جۇرەكتى اۋىرتاتىن كورىنىستەر" بولاتىنىن ايتتى.

ال تاليبان جاعى حالىقارالىق كۇشتەردىڭ ەۆاكۋاسيا مەرزىمىن ۇزارتۋعا كەلىسپەيتىنىن جاريالاپ، ونىڭ "اۋىر سالدارى" بولاتىنىن مالىمدەگەن.