تالىپتەر دوللار مەن كونە بۇيىمداردى اۋعانستانعا اكەلۋگە جانە اۋعانستاننان اكەتۋگە تىيىم سالدى. زاڭدى بۇزعاندار قاتاڭ جازالانباق. بۇل تۋرالى "اۋعانستان" يسلام امىرلىگىنىڭ Twitter پاراقشاسىندا حابارلاندى .
"ءبىز بارلىق ازاماتتارعا قۇرلىق جانە اۋە ارقىلى قانداي دا ءبىر سىلتاۋمەن دوللار مەن انتيكۆاراتتاردى زاڭسىز الىپ وتۋگە نەمەسە ولاردى ەلدەن شىعارۋعا قاتاڭ تىيىم سالىنعانىن حابارلايمىز. ەگەر بۇل زاتتار بىرەۋدىڭ قولىنان تابىلسا، ولار بىردەن تاركىلەنەدى، ال ولاردىڭ يەلەرى زاڭ بويىنشا جازالانادى" دەلىنگەن حابارلامادا.
بۇعان دەيىن تالىپتەر مۋزىكا تىڭداۋعا جانە ونى ورىنداۋعا تىيىم سالعان. ايەلدەردى راديوستانسيالار ارقىلى جۇمىسقا شاقىرۋعا بولمايدى. سونىمەن قاتار، كوروناۆيرۋسقا قارسى ۆاكسيناسياعا دا شەكتەۋ قويعان.
سوڭعى رەت تاليبان كابۋلدى 1996 جىلى باسىپ العان بولاتىن. ولار سول كەزدە ەلدە مۋزىكاعا، سۋرەت سالۋعا، ينتەرنەتكە، كومپيۋتەر مەن تەلەديدارعا تىيىم سالاتىن شاريعات زاڭىن ەنگىزگەن.
ايەلدەرگە قوعامدىق ورىنداردا بەتىن اشىپ جۇرۋگە، جۇمىس ىستەۋگە جانە كوشەگە شىعۋعا ەركەكتەرگە ساقالىن قىرۋعا تىيىم سالعان بولاتىن.
پىكىر قالدىرۋ