الماتى وبلىسىنداعى شەكارا بەكەتىنە قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ ەسىمى بەرىلدى. 

"قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ الماتى وبلىسى بويىنشا دەپارتامەنتى" رەسپۋبليكالىق مەملەكەتتىك مەكەمەسى رايىمبەك اۋدانى بويىنشا شەكارا باسقارماسىنىڭ "بايانقول" شەكارا بولىمشەسىنىڭ اتاۋى "قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ الماتى وبلىسى بويىنشا دەپارتامەنتى" رەسپۋبليكالىق مەملەكەتتىك مەكەمەسى رايىمبەك اۋدانى بويىنشا شەكارا باسقارماسىنىڭ "قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆ اتىنداعى" شەكارا بولىمشەسى دەپ اۋىستىرىلسىن" دەلىنگەن قازاقستان رەسپۋبليكاسى ۇكىمەتىنىڭ 2021 جىلعى 18 تامىزداعى № 567 قاۋلىسىندا.

قاۋلىعا پرەمەر-مينيستر اسقار مامين قول قويعان. ءتيىستى قۇجات adilet.zan.kz پورتالىندا جاريالاندى.

قازاقستاندا تۇڭعىش پرەزيدەنت ەسىمىمەن اتالاتىن قالا، اۋەجاي، ۋنيۆەرسيتەت، مەكتەپ بار. 2019 جىلعى 20 ناۋرىزدا ق.توقايەۆ پرەزيدەنت لاۋازىمىنا كىرىسىپ، انت قابىلداۋ راسىمىندە ەلدەگى قالالاردىڭ ورتالىق كوشەلەرىنە نۇرسۇلتان نازاربايەۆ ەسىمىن بەرۋدى ۇسىنعاننان كەيىن جاپپاي نازاربايەۆ اتىنداعى كوشەلەر مەن داڭعىلدار پايدا بولا باستادى.

ماسەلەن، وسكەمەن مەن پاۆلودار، تالدىقورعانداعى تاۋەلسىزدىك داڭعىلى نازاربايەۆ بولىپ وزگەرتىلدى. ورالداعى دوستىق داڭعىلىنا، اتىراۋدا قانىش ساتپايەۆ داڭعىلىنا، اقتوبەدە ماڭگىلىك ەل داڭعىلىنا، پەتروپاۆلدا مير كوشەسىنە، كوكشەتاۋداعى ماكسيم گوركيي كوشەسى، قوستانايداعى اباي داڭعىلى، شىمكەنتتەگى استانا داڭعىلى، ورالداعى دوستىق-درۋجبا كوشەسى، اقتوبەدەگى ءابىلقايىر حان داڭعىلىنىڭ ءبىر بولىگى، تاراز قالاسىنىڭ ەڭ ۇلكەن كوشەلەرىنىڭ ءبىرى – تولە بي داڭعىلى، قىزىلورداداعى جىبەك جولى كوشەسىنە، الماتىداعى فۋرمانوۆ كوشەسىنە داڭعىلى نۇرسۇلتان نازاربايەۆتىڭ ەسىمى بەرىلدى. قاراعاندىدا بەيبىتشىلىك بۋلۆارى مەن نارمانبەت تولەپوۆ كوشەسىن قوسۋ ارقىلى نۇرسۇلتان نازاربايەۆ داڭعىلى پايدا بولدى. كوشە اتاۋلارى جوق اقتاۋ قالاسىندا نۇرسۇلتان نازاربايەۆ داڭعىلى پايدا بولعان.

بۇدان بولەك، ەلدىڭ بىرنەشە قالاسىندا نازاربايەۆ ەسكەرتكىشى بار. نازاربايەۆ اتىنداعى ساياباق، سپورت كەشەنى جانە مۋزەيلەر بار.