ءماجىلىس ءتوراعاسى نۇرلان نىعماتۋلين شۆەيساريا فەدەرالدى جينالىسى ۇلتتىقكەڭەسىنىڭ ءتوراعاسى اندرەاس ەبي باستاعان دەلەگاسيا وكىلدەرىن قابىلدادى.

پالاتا سپيكەرى شۆەيساريا فەدەرالدى جينالىسى ۇلتتىق كەڭەسى ءتوراعاسىنىڭ قازاقستانعا تۇڭعىش رەت جاساپ وتىرعان رەسمي ساپارىنا ەرەكشە نازار اۋدارىپ، قازاقستان تاۋەلسىزدىگىنىنىڭ 30 جىلدىق جانە شۆەيساريا كونفەدەراسياسى قۇرىلعانىنىڭ 730 جىلدىق مەرەيتويىمەن تۇسپا-تۇس كەلگەن تاريحي ماڭىزدىلىعىنا باسا نازار اۋداردى.  

ودان ءارى تاراپتار ەكى ەل اراسىنداعى، سونىڭ ىشىندە پارلامەنتارالىق  ىنتىماقتاستىقتى دامىتۋ توڭىرەگىندە ورتاق ويلارىمەن ءبولىستى.

نۇرلان نىعماتۋلين اتاپ وتكەندەي، شۆەيساريا ءبىزدىڭ ەلىمىزدىڭ ەۋروپاداعى ماڭىزدى ساياسي جانە ساۋدا-ەكونوميكالىق ارىپتەسى سانالادى. ءوزارا قارىم-قاتىناس ورناعان 29 جىلدىڭ ىشىندە نۇر-سۇلتان مەن بەرن اراسىندا بارلىق سالا بويىنشا ىقپالداستىق تابىستى دامىپ كەلەدى. وسى رەتتە قازاقستاننىڭ تۇڭعىش پرەزيدەنتى، ەلباسى نۇرسۇلتان نازاربايەۆتىڭ قازاقستاندىق-شۆەيساريالىق ىنتىماقتاستىقتىڭ بەرىك نەگىزىن قالاپ، ەلدەر اراسىنداعى ارىپتەستىكتى دامىتۋعا زور كوڭىل بولگەنىن العا تارتا كەلىپ، ءماجىلىس سپيكەرى قازاقستاننىڭ پرەزيدەنتى قاسىم-جومارت توقايەۆتىڭ اتالعان مەملەكەتپەن ەكىجاقتى بايلانىستى ودان ءارى تەرەڭدەتۋگە زور كوڭىل بولەتىنىن اتاپ ءوتتى.

كەزدەسۋ بارىسىندا ءماجىلىس ءتوراعاسى مەملەكەت باسشىسىنىڭ ساياسي، ەكونوميكالىق، الەۋمەتتىك رەفورمالارى تۋراسىندا كەڭىنەن اڭگىمەلەدى.  

نۇرلان نىعماتۋلين اتاپ وتكەندەي، شۆەيساريا قازاقستاننىڭ ءىرى ساۋدا ارىپتەستەرىنىڭ ءبىرى. بۇل ەل ەكونوميكاسىنا 30 ملرد دوللارعا جۋىق ينۆەستيسيا جاساعان. شۆەيساريالىق كاپيتالدىڭ قاتىسۋىمەن قازاقستاندا 400 دەن استام كاسىپورىن جۇمىس ىستەيدى.

نۇرلان نىعماتۋلين قازاقستان ساياسي ديالوگتى، ساۋدا-ەكونوميكالىق، ينۆەستيسيالىق جانە مادەني-گۋمانيتارلىق قاتىناستى ودان ءارى نىعايتۋعا مۇددەلى ەكەنىن ايتا كەلىپ، وسى جولدا بارلىق سالادا، سونىڭ ىشىندە زاڭنامالىق ورگاندار اراسىنداعى سەرىكتەستىكتىڭ ماڭىزدىلىعىنا توقتالدى.

ءوز كەزەگىندە اندرەاس ەبي قازاقستان اۋقىمدى جەرى بار الەمدەگى ءىرى مەملەكەتتىڭ ءبىرى ەكەنىنە توقتالىپ، ءبىزدىڭ ەلىمىزدىڭ ەكونوميكالىق دامۋى قارقىندى، مودەرنيزاسيالىق جەتىستىكتەرى جوعارى، دەموكراتيالىق ۇستانىمدارى بەرىك ەكەنىن ايتتى.

كەزدەسۋ يەلەرى  قوس مەملەكەتتىڭ تاريحي، مادەني ۇقساس بايلانىستارى تەرەڭدە ەكەنىن العا تارتا كەلىپ، ەلدەرىمىز اراسىنداعى بايلانىستى بارلىق سالادا ودان ءارى تابىستى دامىتۋدىڭ مۇمكىندىكتەرى زور ەكەنىن اتاپ ءوتتى.    

ق ر پارلامەنتى ءماجىلىسىنىڭ باسپا ءسوز قىزمەتى