جامبىل وبلىسىنداعى جارىلىس كەزىندە قازا تاپقانداردىڭ Halyk Bank-تەن العان نەسيەلەرى كەشىرىلەدى. بۇل تۋرالى Halyk Bank-تىڭ باسپا ءسوز قىزمەتى حابارلادى. 

"Halyk Bank باسشىلىعى مەن مىڭداعان ادامنان تۇراتىن ۇجىمى جامبىل وبلىسىنداعى جارىلىس سالدارىنان قازا تاپقان اسكەري قىزمەتشىلەردىڭ تۋعان-تۋىستارى مەن جاقىندارىنا شىن جۇرەكتەن كوڭىل ايتادى. قايعىلى وقيعا تجم، اسكەري ءبولىم، اسكەريلەندىرىلگەن كۇزەت جانە اسكەري پروكۋراتۋرا قىزمەتكەرلەرىنىڭ ءومىرىن قيدى. بۇل ەل مەن ءاربىر قازاقستاندىق ءۇشىن ورنى تولماس شىعىن. 

بانك باسشىلىعى زارداپ شەككەن وتباسىلارعا قولداۋ رەتىندە جامبىل وبلىسىندا جارىلىس كەزىندە قازا تاپقان Halyk Bank كليەنتتەرىنە بانكتەن العان قارىزداردى ەسەپتەن شىعارۋ تۋرالى شەشىم قابىلدادى" دەلىنگەن حابارلامادا.

26 تامىز كۇنى جامبىل وبلىسى بايزاق اۋدانىندا ورنالاسقان اسكەري بولىمدە قويمالاردىڭ ءبىرىنىڭ جانىندا ءورت شىققان. ءورت سالدارىنان قويماداعى ءوق-دارى جارىلىپ، سالدارىنان 15 ادام قازا تاپقان. ولاردىڭ اراسىندا ءورت سوندىرۋشىلەر، توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار. اسكەري بولىمنەن جارتى شاقىرىم جەردەگى قاينار اۋىلىنداعى ۇيلەر بۇلىنگەن.

جارىلىستان قازا تاپقانداردىڭ تولىق ءاتى-جونى تومەندەگىدەي:

ەفرەيتور ر.س.جانبولاتوۆ – 40 جاستا

سەرجانت م.س.مەرشىمباي – 40 جاستا

ستارشينا ە.ە.نادىربەكوۆ – 41 جاستا

ازاماتتىق قىزمەتكەر و.د.دالىبايەۆ – 59 جاستا

وڭتۇستىك ءوڭىردىڭ اسكەري پروكۋرورى ا.ق.قاپەزوۆ – 44 جاستا

سەرجانت-ورت ءسوندىرۋشى ا.س.تەمىربولاتوۆ – 28 جاستا

پولكوۆنيك م.ك.ايمانوۆ – 45 جاستا

پودپولكوۆنيك ا.ن.ميكروپۋلو – 50 جاستا

سەرجانت، اعا ءورت قۇتقارۋشىسى ە.ق.ساندىبايەۆ – 30 جاستا

سەرجانت، اعا ءورت قۇتقارۋشىسى ت.ق.تورەبەكوۆ – 40 جاستا

مايور س.ج.الىمبەكوۆ – 36 جاستا

مايور، قاراۋىل باسشىسى س.ۆ.زايكين – 41 جاستا

اعا سەرجانت، جۇرگىزۋشى گ.ج.قۋاتبەك – 26 جاستا

كىشى سەرجانت، ءورت قۇتقارۋشىسى ءا.ق.ادىلبەك – 25 جاستا

قاتارداعى ءورت ءسوندىرۋشى ءا.ب.كەڭەس – 22 جاستا