شىمكەنت قالاسىنىڭ اكىمى مۇرات ايتەنوۆ قالالىق ادىلەت دەپارتامەنتىنىڭ باسشىسىمەن ونلاين جينالىس وتكىزىپ، سالاداعى وزەكتى ماسەلەلەردى تالقىلادى.

دەپارتامەنت باسشىسى نۇرجان ماحامبەتوۆ 6 ايدا اتقارىلعان جۇمىستار جونىندە باياندادى. دەپارتامەنت ءوز قۇزىرىنا ساي جىلجىمايتىن مۇلىككە قۇقىقتاردى، زاڭدى تۇلعالاردى، ازاماتتىق حال اكتىلەرىن تىركەۋ سالالارىن باقىلاۋ، نوتاريات، ادۆوكاتۋرا، زاڭ كەڭەسشىلەرىنىڭ، سوت ورىنداۋشىلارىنىڭ قىزمەتتەرىن رەتتەۋ، زياتكەرلىك مەنشىك قۇقىقتارىن قورعاۋ فۋنكسيالارىن ىسكە اسىراتىنىن ايتتى.

زاڭدى تۇلعالاردى تىركەۋ باعىتىندا اۋداندىق اكىمدىكتەرمەن بايلانىسا وتىرىپ كوپقاباتتى تۇرعىن ۇيلەردەگى 95 مەنشىك يەلەرىنىڭ بىرلەستىكتەرىن تىركەگەن. اتاپ ايتقاندا، اباي اۋدانى – 40؛ ءال-فارابي اۋدانى – 41؛ ەڭبەكشى اۋدانى – 6؛ قاراتاۋ اۋدانى – 87.
سونىمەن بىرگە، سوت اكتىلەرىن ورىنداۋ بارىسىندا زاڭسىز سالىنعان قۇرىلىستاردى بۇزۋ تۋرالى سوت شەشىمدەرىن ورىنداتۋ جانە اليمەنت وندىرتۋدە ماسەلە تۋاتىنىن ايتتى. قازىرگى تاڭدا زاڭسىز نىسان بويىنشا 44 ىستە بورىشكەرلەر وزدەرى قاجەتتى تەحنيكانى تارتىپ، بۇزۋ جۇمىستارىن جۇرگىزبەۋ سالدارىنان ماجبۇرلەپ ورىنداتۋ قيىندىق اكەلگەن.

اليمەنت ءوندىرۋ ساناتىنداعى وندىرىستەردىڭ كوبىسى بويىنشا بورىشكەرلەر قاجەتتى تولەمدەردى جاساۋدا. ءبىراق، 713 ءىس اياسىندا 627 ملن. تەڭگە قۇرايتىن قارىز قالىپتاسىپ تۇر. بارلىعى دەرلىك قارىزدى وندىرۋگە جەتەرلىك بورىشكەرلەردىڭ مۇلىكتەرى مەن تابىستارى جوقتىعىندا. ولاردى حالىقتى جۇمىسپەن قامتۋ ورتالىعىنىڭ ىقپالىمەن جۇمىسپەن قامتۋعا باعىتتالعان ءىس-شارالارى جۇرگىزىلۋدە. بيىل 142 بورىشكەر جۇمىسپەن قامتىلدى، سونداي-اق 342 ادام جۇمىس ىزدەۋشى رەتىندە تىركەلدى.

قالا اكىمى اقپاراتتىق جۇمىستاردى كوپتەپ جۇرگىزۋدى، مەنشىك يەلەرىنىڭ بىرلەستىگىن تىركەۋدى جەدەلدەتۋدى، كوپ بالالى جانە الەۋمەتتىك كومەكتى قاجەت ەتەتىندەرگە تەگىن زاڭدىق كەڭەستەر بەرىپ تۇرۋدى، سونداي-اق، بالالارىن تاستاپ كەتكەن اكەلەردەن اليمەنت وندىرۋدە جوسپارلى جۇمىس جۇرگىزۋدى تاپسىردى.