شىمكەنت قالاسىندا «ساپالى ءبىلىم بەرۋ – قوعام دامۋىنىڭ نەگىزگى فاكتورى» اتتى قالالىق ءبىلىم سالاسى قىزمەتكەرلەرىنىڭ تامىز كەڭەسى ءوتتى. ءبىلىم بەرۋ سالاسىندا سىبايلاس جەمقورلىقتىڭ الدىن الۋدى كۇشەيتۋ ماسەلەلەرىن تالقىلاۋ ماقساتىندا اتالعان شاراعا «شىمكەنت-ادالدىق الاڭى» جوبالىق كەڭسەسىنىڭ باسشىسى جاني قامبار قاتىستى.

قوعامدا سىبايلاس جەمقورلىققا قارسى مادەنيەتتى قالىپتاستىرۋدا، ونىڭ ىشىندە جاستاردىڭ بويىندا ادالدىق، پاراساتتىلىق قۇندىلىقتارىن دارىپتەۋ بويىنشا اتقارىلعان جۇمىستارعا توقتالدى. ونىڭ ايتۋىنشا، ءبىلىم بەرۋ مەكەمەلەرىندە سىبايلاس جەمقورلىقتىڭ الدىن الۋ ماقساتىندا «ادال ۇرپاق» جانە «سانالى ۇرپاق» مەكتەپ جانە ستۋدەنتتىك كلۋبتارى جۇمىس جاساۋدا جانە جىل سايىن مۇشەلەرىنىڭ سانى ارتۋدا.

سونىمەن قاتار، جاستار ءۇشىن بەلگىلى تۇلعالاردىڭ ومىرىنە نەگىزدەلگەن «ادالدىق ساعاتى» ونلاين-ساباقتارى ازىرلەنىپ، ستۋدەنتتەر مەن وقۋشىلارعا كەڭىنەن كورسەتىلۋدە. وسى باعىتتا، قالانىڭ بەلسەندى جاستارىمەن بىرلەسە سىبايلاس جەمقورلىقتىڭ الدىن الۋ تاقىرىپتارىندا برەين رينگ، پىكىرسايىس جانە Kahoot-پلاتفورماسىندا ينتەللەكتۋالدى ويىندار تۇراقتى تۇردە ۇيىمداستىرىلىپ كەلەدى.

قولعا الىنعان الدىن الۋ شارالارىنا قاراماستان، ءبىلىم بەرۋ سالاسىندا سىبايلاس جەمقورلىق تاۋەكەلدەرى سەيىلمەي تۇرعاندىعىنا توقتالعان جاني قامبار، بۇل باعىتتا اشىقتىقتى قالىپتاستىرۋ جانە سىبايلاس جەمقورلىقتىڭ الدىن الۋ بويىنشا بىرلەسە جۇمىس جاساۋعا بارشا قاتىسۋشىلاردى شاقىردى.