ءۇشىنشى مەگاپوليستە جاڭا 2021-2022 وقۋ جىلى ءداستۇرلى فورماتتا بولماق. سونىمەن قاتار بيىل پاندەميالىق جاعدايعا بايلانىستى مەكتەپ فورماسى مىندەتتەلمەيدى. بۇل تۋرالى اقپاراتتىق-كوممۋنيكاسيالىق ورتالىقتا وتكەن باسپا ءسوز جيىنىندا شىمكەنت قالاسى ءبىلىم باسقارماسىنىڭ باسشىسى جانات تاجييەۆا مالىمدەدى.

بۇگىندە شىمكەنت قالاسىنىڭ ءبىلىم بەرۋ ۇيىمدارى جاڭا وقۋ جىلىنا ساقاداي ساي. ماسەلەن، وقۋلىقتار مەن كوركەم ادەبيەتتەر ءبىلىم وشاقتارىنا 100% جەتكىزىلدى. ال، بەينەباقىلاۋ جۇيەسى مەن تۋرنيكەتتەر تولىق ورناتىلعان. بۇل رەتتە وقۋشىلار جاڭا وقۋ جىلىن ءداستۇرلى فورماتتا باستايدى.

جاڭا 2021-2022 وقۋ جىلىندا وقۋشىلارعا مەكتەپ فورماسى مىندەتتەلمەيدى، الايدا كلاسسيكالىق ۇلگىدەگى ىڭعايلى كيىممەن كەلۋگە رۇقسات. ال 30 مىڭ تەڭگە كولەمىندە ءبىر رەتتىك قارجىلاي كومەك العان وتباسىلار، ياعني 57 466 بالا مەكتەپ فورماسىن الۋعا مىندەتتى.

وسى ورايدا 1 قىركۇيەك كۇنى ءبىلىم تابالدىرىعىن اتتاعان بۇلدىرشىندەر ءۇشىن سالتاناتتى جيىن وتەدى، قالعان سىنىپ وقۋشىلارىنا سانيتارلىق تالاپتاردى ساقتاي وتىرىپ سىنىپ ساعاتى بولادى.

ايتا كەتەيىك، ەندى ءبىلىم وشاقتارىنىڭ ءار قاباتىندا سانيتايزەرلەر قويىلىپ، قول جۋۋ ءتارتىبى ءىلىنىپ تۇرۋى كەرەك. دەزينفەكسيالىق زاتتاردىڭ 1 ايلىق قورى بولۋى ءتيىس. بۇل رەتتە كۇنىنە ەكى رەت ىلعالدى، اپتاسىنا ءبىر رەت جالپى تازالىق جۇمىستارى جۇرگىزىلۋى قاجەت. ال سىنىپ ءىشى 25 بالادان اسپاۋى كەرەك.

قالاداعى بارلىق ءبىلىم ۇيىمىندا «Ashyq» جوباسى تولىق قوسىلعان. وسى ورايدا مەديسينالىق قارسى كورسەتىلىمدەرى بار ادامداردى ساناماعاندا پەداگوگتار مەن تەحنيكالىق پەرسونالدار 100 پايىز ۆاكسيناسيالانعان.

سونىمەن قاتار جانات تاجييەۆا ەپيدەميولوگيالىق جاعدايعا بايلانىستى تاربيەلەنۋشىلەردىڭ اتا-انالارىن ۆاكسينا سالدىرۋعا شاقىرا وتىرىپ، مەكتەپتەگى دەزينفەكسيالىق زاتتارعا اقشا جيناماۋدى ءوتىندى. ويتكەنى ءبىلىم ۇيىمدارىنا قاجەتتىلىك زاتتىڭ بارىنە قارجى ءبولىنىپ وتىرعانىن ارنايى جەتكىزىپ، اتا-انا بالالارىن تەك بەتپەردەمەن قامتاماسىز ەتۋ كەرەكتىگىن ايتتى.