COVID-19-دان ساۋىققان 400-گە جۋىق الماتىلىق مەديسينالىق ساقتاندىرۋ ەسەبىنەن پوستكوۆيدتىك وڭالتۋدان ءوتتى. بۇل تۋرالى الماتى قالاسىنىڭ الەۋمەتتىك مەديسينالىق ساقتاندىرۋ قورىنىڭ ديرەكتورى تىلەۋحان ابىلدايەۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا مالىمدەدى.

سپيكەردىڭ ايتۋىنشا، قور ءۇشىن باسىم مىندەتتەردىڭ ءبىرى - «كامەنسكوە پلاتو» فتيزيوپۋلمونولوگيا وڭالتۋ ورتالىعىندا جۇرگىزىلەتىن پوستكوۆيدتىك وڭالتۋ بويىنشا جەتكىزۋشىلەر ءتىزىمىن ۇلعايتۋ. الماتىدا 400-گە جۋىق پاسيەنت جالپى 285،4 ملن تەڭگەگە كوروناۆيرۋستان كەيىن ەمدەلدى.

«بۇگىن ءبىز پوستكوۆيدتىك وڭالتۋ بويىنشا جەتكىزۋشىلەردى، سونىڭ ىشىندە جەكە جەتكىزۋشىلەردى تارتۋ بويىنشا جۇمىس جاسايمىز. اتاپ ايتقاندا، ايماقتىق كوميسسيا وڭالتۋدىڭ وسى تۇرىنە قاتىسۋ ءۇشىن كەزەكتى كونكۋرس جاريالادى. الدىن الا مالىمەتتەر بويىنشا، الماتى قالاسىندا پوستكوۆيدتىك وڭالتۋ بويىنشا جەتكىزۋشىلەر ءتىزىمى ەكى سۋبەكتىگە دەيىن ءوستى»، - دەدى ت. ابىلدايەۆ.

سونىمەن قاتار، كونسۋلتاسيالىق-دياگنوستيكالىق كومەك كورسەتۋ ءۇشىن مەديسينالىق ۇيىمدارعا شامامەن 8،9 ملرد تەڭگە تولەندى. ولاردىڭ ىشىندە كت مەن مرت بارىنشا سۇرانىسقا يە.

ءبىرىنشى جارتىجىلدىقتا الماتىدا 386،6 ملن تەڭگەگە 30 468 كت قىزمەتى، شامامەن 400 ملن تەڭگەگە 29 789 مرت قىزمەتى كورسەتىلدى. 767،7 ملن تەڭگە سوماسىندا ونكولوگيالىق ىسىكتەردى انىقتاۋ بويىنشا 3040 پەت-دياگنوستيكاسى جۇرگىزىلدى.

ءمامس جۇيەسى اياسىندا جوسپارلى سكرينينگتىك تەكسەرۋلەردەن وتۋگە 508،3 ملن ءبولىندى.