ۆاكسينالانۋدىڭ باياۋ قارقىنى كوروناۆيرۋس جۇقتىرعاندار سانىنىڭ ودان دا ارتۋىنا اكەلۋى مۇمكىن. ۆاكسيناسيا ۆيرۋس مۋتاسياسىنىڭ الدىن الادى. بۇل تۋرالى الماتى قالاسى №8 ەمحانانىڭ باس دارىگەرى فاريدا اعىبايەۆا حابارلادى.

ەمحانانىڭ باس دارىگەرى ەكپە العاننان كەيىن COVID-19 يممۋنيتەتى قالاي داميتىنىن جانە ەكى كومپونەنتتى الۋدىڭ ماڭىزدىلىعىن ايتتى.

ونىڭ ايتۋىنشا، ۆاكسينانى العاننان كەيىن ادام اعزاسى ۆاكسينامەن تانىسادى جانە يممۋندىق جاسۋشالاردىڭ ەكى ءتۇرىنىڭ جۇمىسىن باستايدى: ۆ جانە ت-جاسۋشالارى.

«ۆ-جاسۋشالارى انتيدەنەلەردى بەلسەندى تۇردە قالىپتاستىرادى، ءبىراق ۆاكسينانىڭ ەكىنشى دوزاسىنسىز بۇل يممۋنوگلوبۋليندەردىڭ مولشەرى بىرنەشە اپتادان كەيىن كۇرت تومەندەيدى. ت-ليمفوسيتتەر-يممۋندىق جۇيەنىڭ نەگىزگى قارۋى. ءدال وسى ت-جاسۋشالار ءقاۋىپتى تاۋىپ، قوزدىرعىشتى جويادى. ت-جاسۋشالارىنىڭ نەگىزگى ماسەلەسى – ۆاكسيناسيانىڭ ءبىرىنشى كەزەڭىنەن كەيىن يممۋندىق جۇيە ت-ليمفوسيتتەردىڭ وتە از مولشەرىن جاسايدى، ال اعزا ۆيرۋستى قابىلداۋعا دايىن ەمەس كۇيىندە قالادى»، - دەپ ءتۇسىندىردى ف. اعىبايەۆا.

سوندىقتان يممۋندىق رەاكسيانىڭ قالعان بولىگىن ىسكە قوسۋ ءۇشىن ۆاكسينانىڭ ەكىنشى دوزاسىن الۋ قاجەت.

«قازىرگى كەزدە COVID-19 ۆاكسينالارىنا جۇرگىزىلگەن ۇلكەن مەديسينالىق زەرتتەۋلەردىڭ ناتيجەلەرى كورسەتكەندەي، ەكىنشى دوزا قورعانىس دارەجەسىن بىرنەشە ەسە ارتتىرادى. يزرايل عالىمدارى كوروناۆيرۋستىق ۆاكسينانىڭ ەكى دوزاسىن دا قابىلداعان پاسيەنتتەردە قاراعاندا 6-12 ەسە جوعارى دەگەن قورىتىندىعا كەلدى. وسىلايشا، ءبىز ۆاكسينانىڭ ەكىنشى كەزەڭى سەنىمدى قورعانىس ءۇشىن اسا ماڭىزدى ەكەنىن كورەمىز»، - دەدى ەمحانانىڭ باس دارىگەرى.

كوروناۆيرۋسقا قارسى ۆاكسينانى 21 كۇن ارالىقپەن ەكى كەزەڭدە الۋ كەرەك. ءبىرىنشى دوزا انتيدەنەلەردىڭ از مولشەرىن وندىرۋگە بايلانىستى تۇراقتى قورعانىس اسەرىن قامتاماسىز ەتپەيدى. ەكىنشى دوزا ءبىرىنشىسىنىڭ اسەرىن كۇشەيتەدى جانە بەكىتەدى، ادام اعزاسىنداعى انتيدەنەلەردىڭ مولشەرى ارتادى.

الماتىنىڭ №8 ەمحاناسى دا ءۇش ەكپە بولمەسى بار ءارى ءۇش ءموبيلدى توپ جۇمىس ىستەيدى. ەكپە سالۋدى ۆاكسينالاۋعا رۇقساتى بار 36 مەديسينالىق قىزمەتكەردەن تۇراتىن التى بريگادا جۇرگىزەدى.

«ەمحانادا ەگۋلەر egov.kz پورتالى مەن تىركەلۋ ارقىلى الدىن الا جازىلىپ، سونداي-اق كەزەك بويىنشا، ءۇزىلىسسىز جانە دەمالىس كۇندەرى ساعات 8.00-دەن 20.00-گە دەيىن جۇرگىزىلەدى»، - دەدى ف. اعىبايەۆا.

ەمحانانىڭ ەگۋ پۋنكتتەرىنىڭ جالپى وتكىزۋ قابىلەتتىلىگى تاۋلىگىنە 300-400 ادام. بۇگىندە مۇندا 26 235 ادام ەكپە الدى.