"وداقتاس اۋعاندار ۇلىبريتانياعا ءبىرجولا كوشىپ كەتە الادى" دەپ حابارلادى بريتان ىشكى ىستەر مينيسترلىگى.
ۇلىبريتانيا 13 تامىزدان باستاپ اۋعانستاننان قونىس اۋدارۋ جانە كومەك ساياساتىنا قۇقىلى 8000-نان استام ادامدى ەۆاكۋاسيالادى.
ءبىراق اعىلشىن ساياساتكەرلەرى اۋعانستاندا قالىپ قويعان، ومىرىنە ءالى دە ءقاۋىپ ءتونىپ تۇرعان كوپتەگەن اۋعاندار ءۇشىن نە ىستەۋ كەرەك ەكەنىن تالقىلاپ جاتىر. بريتانيا اسكەرى تامىزدىڭ سوڭىندا اۋعانستاننان كەتىپ، اۋعانستانداعى 20 جىلدىق اسكەري ميسسياسىن اياقتاعان.
ۇلىبريتانيا سىرتقى ىستەر ءمينيسترى دومينيك رااب اۋعانستاندا قالعان ۇلىبريتانياعا كەلۋگە قۇقىلى ادامداردىڭ سانى تۋرالى "ناقتى" اقپارات ايتا المايتىنىن مالىمدەدى.
ىشكى ىستەر مينيسترلىگى "جىلى قارسى الۋ وپەراسياسى" دەپ اتالاتىن جوسپارى تۋرالى تولىعىراق مالىمدەي وتىرىپ، ۇلىبريتانياعا كەلگەن اۋعانداردىڭ ءومىرىن قالپىنا كەلتىرۋگە كومەك بەرگىسى كەلەتىنىن ايتتى.
"اۋعانستاندىق قونىس اۋدارۋ جانە كومەك ساياساتى" بۇرىنعى كەلگەن اۋعاندارعا ارنالعان ساياسات بولاتىن. ول ساياسات بۇعان دەيىن ۇلىبريتانياداعى جەرگىلىكتى جۇمىسپەن قامتىلعان اۋعاندار مەن ولاردىڭ وتباسىلارىنا ارنالعان. ولاردىڭ ومىرىنە تاليباننان ءقاۋىپ بار دەپ باعالانعان.
بۇعان دەيىن ۇلىبريتانياعا ۋاقىتشا تۇرۋعا رۇحسات بەرىلگەندەر ەندى يمميگراسيالىق ستاتۋسىن وزگەرتە الادى. "بۇل قۇقىقتار تالىپتەردەن قىسىم كورگەن اۋعاندارعا ۇلىبريتانيادا شەكتەۋسىز تۇراقتى جۇمىسقا قول جەتكىزۋگە مۇمكىندىك بەرەدى" دەپ مالىمدەدى اعىلشىن ۇكىمەتى.
ال پرەمەر-مينيستر بوريس دجونسون اۋعانستاندا قارۋلى كۇشتەرمەن جۇمىس ىستەگەندەرگە ۇلىبريتانيا ۇلكەن قارىزدار ەكەنىن ايتتى.
"مەن ولارعا جانە ولاردىڭ وتباسىلارىنا ۇلىبريتانيادا ومىرلەرىن قالپىنا كەلتىرۋ ءۇشىن قاجەتتى قولداۋ كورسەتەتىنىمىزگە سەنىمدىمىن. مەن بۇل وتە قيىن ۋاقىت بولاتىنىن بىلەمىن. ولارعا بريتانيالىقتار بۇرىنعىداي قولداۋ مەن جومارت جۇرەكتەرىن سىيلايدى دەپ ۇمىتتەنەمىن" دەدى بوريس دجونسون.
بۇعان دەيىن دەموكراتيالىق باتىس ەلدەرىنىڭ ساياساتكەرلەرى تالىپتەردەن زارداپ شەككەن حالىققا كومەكتەسۋ ساياساتىن ازىرلەپ جاتقانى جاريالانعان. گەرمانيا ءالى دە 40 مىڭ اۋعاندى قابىلدايتىنىن مالىمدەدى.
پىكىر قالدىرۋ