حالىقتىڭ وسال توپتارىن الەۋمەتتىك قورعاۋ مەن قولداۋ – الەۋمەتتىك ساياساتتىڭ باستى باعىتتارىنىڭ ءبىرى. شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، قالادا 36 823 مۇمكىندىگى شەكتەۋلى ازامات تىركەلگەن، ونىڭ ىشىندە 6 391ء-ى – 18 جاسقا دەيىنگى مۇگەدەكتىگى بار بالالار.

اتالعان وسال توپتارعا جانە ارداگەرلەرگە مەرەكە مەن اتاۋلى كۇندەرگە ارنالعان ءبىر رەتتىك جانە اي سايىنعى 13 ءتۇرلى كومەك كورسەتىلەدى. جىل باسىنان بەرى مۇگەدەكتىگى بار ازاماتتارعا الەۋمەتتىك قىزمەتتەر پورتالى ارقىلى قاجەتتى قۇرالدار مەن قىزمەتتەرگە تاپسىرىس بەرۋ تاجىريبەسى ىسكە قوسىلدى. ياعني، مۇگەدەكتىگى بار ازاماتتار تەحنيكالىق وڭالتۋ قۇرالدارىنىڭ 55 ءتۇرىن جانە قىزمەتتەردىڭ 3 ءتۇرىن ءوزىنىڭ ەلەكتروندىق قولتاڭباسىن (ەسق) پايدالانا وتىرىپ، ونلاين تاپسىرىس بەرۋگە قول جەتكىزىلدى.

الەۋمەتتىك پورتال ارقىلى پروتەزدىك-ورتوپەديالىق، سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق، كرەسلو-اربالارمەن قامتاماسىز ەتۋ قاراستىرىلعان. ارنايى الەۋمەتتىك قىزمەتتەرگە جەكە كومەكشىلەردىڭ، ىمداۋ ءتىلى ماماندارىنىڭ جانە ساناتوريي-كۋرورتتىق ەمدەۋ قىزمەتتەرى دە كىرەدى.

پورتال مۇمكىندىگى شەكتەۋلى ازاماتتاردىڭ ۇيىنەن شىقپاي-اق ەسق كومەگىنە سۇيەنۋگە مۇمكىندىك بەرۋدە. ناتيجەسىندە شىمكەنت قالاسى بويىنشا 26 714 ءوتىنىش قابىلدانىپ، 16 308 مۇكىندىگى شەكتەۋلى ازاماتقا وڭالتۋ قۇرالدارى جەتكىزىلگەن.

مۇگەدەكتىگى بار ازاماتتاردىڭ جەكە وڭالتۋ باعدارلاماسىندا تەحنيكالىق، پروتەزدىك-ورتوپەديالىق جانە گيگيەنالىق قۇرالدار قاجەتتىلىگى كورسەتىلگەن بولسا، «الەۋمەتتىك پورتال» ارقىلى تەگىن تاپسىرىس بەرە الادى. ەگەر ازاماتتار تەحنيكالىق وڭالتۋ قۇرالىنىڭ قىمبات ءتۇرىن تاڭداعان جاعدايدا، ۇستىندەگى اقشاسىن ءوزى تولەپ الۋىنا بولادى.