تاۋەلسىز قازاقستانداعى العاشقى ءىرى كاسىپكەرلەرىنىڭ ءبىرى بولات ءابىلوۆ 90 جىلدارى قىلمىستىق توپ وكىلدەرىمەن قالاي قارىم-قاتىناس قۇرعانىن ايتىپ بەردى.
ول 90 جىلدارى كريمينال اۆتوريتەتتەر كاسىپكەرلەردەن ءجيى اقشا جيناپ تۇرعانىن، جەكە ءوزى ەشكىمگە ەشتەڭە ۇستاتپاعانىن ايتادى. سوزىنشە، كاسىپكەرلەردەن اقشا "سىندىرا الماعان" قىلمىستىق توپ وكىلدەرى قاندايدا ءبىر پايدا كورىپ قالۋ ءۇشىن ولارمەن دوستاسۋعا تىرىسقان.
بيزنەسمەننىڭ ايتۋىنشا، "پولە چۋدەس" تەلەباعدارلاماسىندا Butya كومپانياسى جارنامالانعاننان كەيىن كوپتەگەن كاسىپكەرلەر مەن ماسكەۋلىك اۆتوريتەتتەر تاراپىنان قىزىعۋشىلىق ارتا تۇسكەن. "رىجيي الماس" (90 جىلدارداعى قىلمىس الەمى اۆتوريتەتتەرىنىڭ ءبىرى، شىن ەسىمى نەسىپباي ناسەنوۆ - رەد) ارقىلى ونىڭ كىم ەكەنىن انىقتاپ، اقشا تولەپ تۇرۋعا ماجبۇرلەۋگە تىرىسقان.
– "پولە چۋدەس"-كە جارناما بەرگەننەن كەيىن بىزبەن جۇمىس ىستەگىسى كەلەتىندەردەن تۇسكەن تەلەفون قوڭىراۋلارىندا ەسەپ بولمادى. تاڭەرتەڭ "رىجيي الماس" كەلىپ تۇر. ماسكەۋلىك اۆتوريتەتتەر سۇراپ جاتقانىن، اقشا تولەمەسەم، ماسكەۋدەگى فيليالىمىزدا پروبلەما بولاتىنىن ايتتى. مەن الماسقا "ەگەر ماسكەۋدە بىزدە پروبلەما بولسا، سەندە وسى جەردە پروبلەما بولادى، وعان كۇمانىڭ بولماسىن" دەدىم. سول كۇنى كەشكە ۇيگە كەلسەم، پودەزد الدىندا ەكى بانديت مەنى كۇتىپ تۇر ەكەن. مەن كولىكتەن تۇسە سالا "قايىرلى كەش، قالدارىڭ قالاي" دەپ قولدارىن الىپ وتە شىقتىم. پودەزد ەسىگىن اشسام، تاعى ەكەۋى تۇر. ولار مەنى سوعىپ كەتۋ ءۇشىن تۇرعانى بەلگىلى. ءبىراق انالارمەن امانداسىپ كىرگەنىمدى كورىپ نە ىستەرلەرىن بىلمەي قالدى. تەرەزەدەن قاراسام، اينالسوقتاپ ءجۇردى دە كەتىپ قالدى. كەلەسى كۇنى ماعان قاستاندىق جاسالعالى جاتقانىن ايتىپ، ورگانعا ارىز ءتۇسىردىم. ءبىز كەلىسىپ، بانديتتەردى قىلمىس ۇستىندە ۇستاۋدىڭ جوسپارىن قۇردىق. كەشكە ميليسيا ءۇي جاقتا تۇزاق قۇرىپ مەنى توستى. كەشكە ءۇي جاققا كەلسەم، مەنى ءۇش جىگىت توسىپ تۇر ەكەن. جاقىنداعانىم سول ەدى ميليسيونەرلەر جۇگىرىپ كەلدى. ءبىراق ولاردىڭ قۇرعان تۇزاعى ءساتسىز بولىپ، بانديتتەر قاشىپ كەتتى، – دەدى بيزنەسمەن مەدياكاسىپكەر ارمانجان بايتاسوۆقا بەرگەن سۇحباتتار سەرياسىنىڭ كەزەكتى سانىندا.
وقي وتىرىڭىز:
♦ "سابىرجان ۇندەمەي قالدى". بولات ءابىلىوۆ قىلمىس الەمىنىڭ سەركەلەرىمەن قالاي سويلەسكەنىن ايتتى
پىكىر قالدىرۋ