اقتوبەنىڭ ىرگەسىندەگى اقجار-2 اۋىلىنىڭ تۇرعىندارى ارىس پەن تاراز وقيعاسى قايتالانا ما دەپ ۇرەيلەنىپ وتىر. سەبەبى ولارعا جاقىن ماڭدا جارىلعىش زاتتار قويماسى ورنالاسقان، دەپ حابارلادى استانا ارناسى.
اقجار-2 ەلدى مەكەنى تۇرعىندارى جارىلعىش زاتتار ساقتايتىن قويمانى قۇزىرلى ورگاندار تەكسەرىپ، ءقاۋىپ بولسا، باسقا جەرگە كوشىرسە ەكەن دەپ وتىر.
– ارىستا بولعان نارسە، تارازدا بولعان نارسە ەرتەڭ تاعى قايتالانىپ جۇرسە، سانىمىزدى سوعىپ قالامىز. مىنا جەردە ۇلكەن مەكتەپ بار. مىڭ جارىم ورىندىق مەكتەپ. سونىڭ بارىنە ءقاۋىپ ءتونىپ تۇر، – دەدى اۋىل تۇرعىنى جاردەم قازتۋعانوۆ.
تۇرعىنداردىڭ ايتۋىنشا، اۋىل ماڭىنا اسكەري ادامدار ءجيى كەلەتىن كورىنەدى. قويمادا سناريادتار بار ەكەنىن ەستىپ، اۋىل ادامدارى ۇرەيلەنە باستاعان. سوندىقتان قۇزىرلى ورگاندار كەلىپ، قاراپ تەكسەرگەنىن قالايدى.
– جەر استىندا تروتيل بولۋى مۇمكىن. ونى تەك تەكسەرگەننەن كەيىن بىلە الامىز. ءبىزدىڭ تالابىمىز سول – كوشىرە مە؟ ۇكىمەت ءوزى قارايدى. جاقىن جەر، تروتيل جارىلماسىن، جارىلسا كوپكە دەيىن جەتەدى، – دەدى اقجار تۇرعىنى عاني دارىبايەۆ.
بەلگىلى بولعانداي، اقجار-2-دەگى قويما "قازوندىرىسگەوفيزيكا" مەكەمەسىنە تيەسىلى. توتەنشە جاعدايلار مينيسترلىگىنە قاراستى ونەركاسىپتىك قاۋىپسىزدىك كوميتەتىنىڭ اقتوبەدەگى وكىلدەرى قويماداعى جارىلعىش زاتتار تەك وندىرىستىك ماقساتتا –مۇناي ءوندىرۋ كەزىندە قولدانىلاتىنىن ايتادى. ال، قويمانىڭ ورنالاسقان جەرى قاۋىپسىزدىك ەرەجەلەرىنە ساي، قاشىقتىق نورماسى ساقتالعان. جىلىنا ءبىر رەت تەكسەرىلەتىنىن اتاپ ءوتتى.
– بۇل اۋدان جاڭادان سالىنىپ جاتقاندا، 2000 جىلداردىڭ باسىندا ول جەردە ءۇي تۇرعىزۋعا بولمايدى دەپ ءتيىستى ورگاندارعا حات جازدىق. سوعان قاراماستان، ەلدى-مەكەن بوي كوتەردى. ول جەردە بۇرىن 3 قويما بولعان. "زاپكازۆزرىۆپروم"، "قازسكۋبنيتروحيم" جانە "قازوندىرىسگەوفيزيكا" مەكەمەسى قويماسىنان ءقازىر تەك سوڭعىسى قالدى، - دەيد ق ر تج مينيسترلىگى ونەركاسىپتىك قاۋىپسىزدىك كوميتەتى اقتوبە وبلىسى بويىنشا دەپارتامەنتى ديرەكتورىنىڭ ورىنباسارى سامات تاجداۋلەتوۆ.
ونەركاسىپتىك قاۋىپسىزدىك ماماندارى قويمانى كوشىرۋ جونىندە "قازوندىرىسگەوفيزيكا" مەكەمەسى باسشىلىعىنا حات جازعان. ماسەلە ازىرگە باسى اشىق كۇيدە تۇر.
پىكىر قالدىرۋ