ءبىلىم جانە عىلىم مينيسترلىگى الەۋمەتتىك وسال توپتاردان شىققان 50 مىڭنان استام بالا كوللەدج گرانتىن يەلەنگەنىن حابارلادى.
وتكەن جىلمەن سالىستىرعاندا جەڭىلدىكتەر بويىنشا وقۋعا تۇسكەن تالاپكەرلەردىڭ سانى 16 مىڭعا ارتقان.
– بيىل العاش رەت ازاماتتاردىڭ الەۋمەتتىك وسال توپتارىنان شىققان بالالاردىڭ كوللەدجدەرگە ءتۇسۋى ءۇشىن كۆوتالار ەنگىزىلدى. بۇل جەتىم بالالار، اتا-اناسىنىڭ قامقورلىعىنسىز قالعان بالالار، كوپبالالى جانە تولىق ەمەس وتباسىلاردان شىققان بالالار، مۇگەدەك بالالار، مۇگەدەك بالالاردى تاربيەلەپ وتىرعان وتباسىلاردان شىققان بالالار، سونداي-اق ۇوس قاتىسۋشىلارى مەن مۇگەدەكتەرىنە جەڭىلدىكتەر بويىنشا تەڭەستىرىلگەن ادامدار. سونداي-اق كۆوتا بويىنشا مەملەكەتتىك ءبىلىم گرانتتارىن اۋىل جاستارى دا يەلەندى، – دەدى بعم تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا.
بيىل 9-11 سىنىپتاردىڭ 95 مىڭنان استام تۇلەگى ەلدەگى كوللەدجدەرگە وقۋعا تۇسكەن. اسىرەسە، مەديسينالىق جانە شىعارماشىلىق ماماندىقتار سۇرانىسقا يە بولعان. بيىل كوللەدجدەرگە قابىلداۋ 25 ماۋسىمدا باستالىپ، 31 تامىزعا دەيىن جالعاستى.
گرانتتار "اقشا ستۋدەنتپەن بىرگە جۇرەدى" قاعيداتى بويىنشا ءبولىندى، بۇل جاڭاشىلدىقتاردىڭ ءبىرى. بۇرىن مەملەكەتتىك تاپسىرىس ورىندارىن كوللەدجدەر بويىنشا كوميسسيا بولەتىن بولسا، ەندى بۇل پروسەسس بارىنشا اشىق بولا تۇسكەن. جاڭا ەرەجەگە سايكەس، تالاپكەر قاي كوللەدجدى تاڭداسا، بيۋدجەت قاراجاتى دا سول وقۋ ورنىنا باعىتتالادى.
سونىمەن قاتار بۇرىن تالاپكەرلەر تەك 1 ماماندىق پەن 1 كوللەدجدى عانا تاڭداي السا، بيىل تۇلەكتەرگە 4 ماماندىق پەن 4 كوللەدجدى تاڭداۋ مۇمكىندىگى بەرىلدى.
