ءوز قۇقىعىن قورعاۋ ءۇشىن تالىپتەرگە قارسى نارازىلىققا شىققان اۋعان ايەلدەرىنە قىسىم كورسەتىلىپ جاتىر. بۇل تۋرالى Daily Beast باسىلىمى حابارلادى.
تالىپتەر كەيبىر ايەلدەردى نارازىلىق اكسياسىنا قاتىستىرماۋ ءۇشىن جەرتولەگە قاماپ، ولاردى تاياقپەن ۇرىپ، اۋەگە وق اتىپ قورقىتۋدا. الەۋمەتتىك جەلىدە بانكتىڭ جەر استى اۆتوتۇراعىنا قامالعان ايەلدەردىڭ ۆيدەوسى جاريالاندى.
– تالىپتەر كابۋل كوشەلەرىندەگى نارازىلىققا جول بەرمەۋ ءۇشىن ايەلدى ازيا بانكىنىڭ جەرتولەسىنە قاماپ قويدى، – دەپ ايتادى ۆيدەودا.
سونداي-اق تالىپتەر اۋعانستان استاناسىنداعى نارازىلىقتاردى تاراتۋ ءۇشىن ايەلدەرگە تاياق پەن قارۋ-جاراق قولدانعان.
باسىلىم حابارلاۋىنشا، ايەلدەر ءبىلىم الۋ، جۇمىس ىستەۋ قۇقىعىن جانە ەر ادامسىز ۇيدەن شىعۋ مۇمكىندىگىن ساقتاپ قالعىسى كەلەدى. ولار وسى مۇمكىندىكتىڭ بارىنە سوڭعى 20 جىلدا قول جەتكىزگەن.
– ءبىز الەۋمەتتىك جەلىلەر ارقىلى ادامداردى ميتينگكە شاقىردىق. ولار ءبىز كۇتكەننەن دە كوپ جينالدى. ءبىز بۇگىن تۇندە نارازىلىققا شىعاتىن باسقا دا ادامداردى كۇتەمىز. ويتكەنى ادامدار تەرروردى، سوعىستى قالامايدى. تالىپتەر بيلىك باسىنا كەلگەننەن بەرى ولىمدەر مەن تەررورلىق شابۋىلدار كوبەيىپ كەتتى. نارازىلىققا شىعۋىمىزعا ولار ءبىزدى وزدەرى يتەرمەلەدى، – دەيدى نارازىلىقتى ۇيىمداستىرۋشىلاردىڭ ءبىرى.
پىكىر قالدىرۋ