باس پروكۋراتۋرا قازاقستاندىق بانكتىڭ ازاماتتاردان نەسيەلەرى مەن قارىزدارى بويىنشا قاراجاتتى نەگىزسىز ۇستاۋ فاكتىلەرىن انىقتاعانىن حابارلادى.
ەڭبەك كودەكسىندە (115-باپ) جانە ″قازاقستان رەسپۋبليكاسىندا زەينەتاقىمەن قامسىزداندىرۋ تۋرالى″ زاڭىندا (23-باپ) تيەسىلى جالاقى مەن زەينەتاقى سوماسىنىڭ 50%-نان استامىن ءوندىرىپ الۋعا تىيىم سالىنعان.
الايدا بانكتەر ("Kaspi Bank"، "ەۋرازيالىق بانك»، "قازاقستان حالىق بانكى"، "حوۋم كرەديت ەند فينانس بانك" اق) ازاماتتاردىڭ شوتتارىنداعى اقشالاي قاراجاتتارىن بەكىتىلگەن تىيىمنان جوعارى كولەمدە ەسەپتەن شىعارعان.
– بۇل پروبلەما بانكتەر اقشالاي قاراجاتتىڭ بانكتىك شوتقا تۇسكەنگە دەيىن جۇرگىزىلگەن اتقارۋشىلىق ءىس جۇرگىزۋ بويىنشا ۇستاۋلاردان حاباردار بولماۋىنىڭ سالدارىنان بولىپ وتىر. وسىنداي ارەكەتتەردىڭ ناتيجەسىندە قارىز الۋشىلار وزدەرىنىڭ جالعىز تابىس كوزىنەن زاڭسىز ايىرىلعان. بۇل حالىقتىڭ نارازىلىعىن تۋدىرۋدا، – دەپ مالىمدەدى باس پروكۋراتۋرا.
باس پروكۋراتۋرانىڭ ۇسىنۋى بويىنشا قارجى نارىعىن رەتتەۋ جانە دامىتۋ اگەنتتىگى اتالعان پروبلەمانى تومەندەگى شارالاردى قابىلداۋ ارقىلى شەشكەن.
- كليەنتتىڭ ءوتىنىشى نەگىزىندە بانكتەر جانە سوت ورىنداۋشىلارى ارتىق تولەنگەن سومانى 5 جۇمىس كۇنى ىشىندە قايتارۋ الگوريتمى قولدانىسقا ەنگىزىلدى؛
- قازاقستان بانكتەرىنىڭ بازاسى اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسىمەن ينتەگراسيالانعان.
زاڭسىز ءوندىرىپ الۋ فاكتىلەرى بولعان جاعدايدا ازاماتتار قارجى نارىعىن رەتتەۋ جانە دامىتۋ اگەنتتىگىنە، ونىڭ اۋماقتىق بولىمشەلەرىنە نەمەسە پروكۋراتۋراعا شاعىمدانا الادى.
پىكىر قالدىرۋ